Friday, December 31, 2010

Хүний мөс



Италийн алдарт кино од Vittorio de Sica телевизийн нэгэн нэвтрүүлэгт оролцохдоо ингэж ярьжээ. 

Италийн Наполи хотын захын хорооллын нэгэн кафед кофе ууж байлаа. Кафед орж ирсэн нэгэн үйлчлүүлэгч зөөгчид хандан
- Due caffee, un sospeso (хоёр кофе, нэг нь өлгүүрт) гэж хэлээд хоёр аяга кофены мөнгө төлөөд нэг аяга кофе уугаад явав. 
Зөөгч лангууны дээр байсан хадаасанд нэг жижиг цаас хатгав. Удалгүй хоёр хүн орж ирэн
-Due caffee e un sospeso (хоёр кофе, нэгийг нь өлгүүрт) гэж захиалаад гурван аяга кофены мөнгө төлөөд хоёр аяга кофе уув. 
Зөөгч дахин нэг цаас авч, хадаасанд хатгалаа.
Иймэрхүү байдлаар олон үйлчлүүлэгч орж гарав. Харин хуучин ноорхой хувцастай нэгэн ядуу хүн кафед орж ирээд зөөгчид хандан
-Un caffee sospeso (өлгүүрээс нэг кофе) гэхэд зөөгч түүнд кофег нь авчирж өгөв. Өнөөх хүн мөнгө төлөлгүй гарч явлаа. Зөөгч лангууны дээрх хадаасанд хатгасан цааснаасаа нэгийг нь авав.

Сургамжит өгүүллэг 3-аас...
READ MORE - Хүний мөс

Thursday, December 9, 2010

Амьдралын сонголт



Нэгэн өдөр тосгонд гол үерлэжээ. Тариачин эр голд живсэн эхнэрээ аварч байгаад хүүгээ аварч чадсангүй. Тэр явдлаас хойш тариачны сонголтын талаар тосгоны амтай болгон л зөв буруу гэлцэн ярилцаж байв. 
-Дахиад хүүтэй болж болно шүү дээ. Зөв сонголт байсан гэж сайшаах хүн байсан ч 
-Дахиад гэрлэж болно. Гэтэл нэгэнт өөд болсон хүү нь дахин олдохгүй биз дээ? гэж буруушаах хүн ч байв.
Тосгоны нэгэн эр өнөөх тариачин дээр очиж тэр үед юу бодсоныг нь асууж гэнэ. Тариачин ингэж хариулжээ.
- Тэр үед юм бодох сөхөө байгаагүй. Үерийн ус оволзоход эхнэр минь түрүүлж харагдсан. Тэгээд эхнэрээ аврахаар голд үсэрч орсон. Хүүгээ аврахаар эргэхэд нэгэнт хожимдсон байсан.
READ MORE - Амьдралын сонголт

Monday, November 29, 2010

Хэрэв би мэдэж байсансан бол...



Хэрэв би таныг надтай дахин хэзээ ч уулзахгүйгээр холын хол явчихна гэдгийг мэдэж байсансан бол чанга тэврээд бас үнсэх байсан юм.

Хэрэв би таны дуу хоолойг хамгийн сүүлийн удаа сонсож байгаагаа мэдсэнсэн бичлэг хийж аваад, таныг санах болгондоо үүнийгээ үзэж өөрийгөө тайвшруулах байсан юм.

Хэрэв би таныг хамгийн сүүлийн удаа сургаал үгээ хэлж байгааг мэдсэнсэн бол "Би наад үгийг чинь зөндөө сонссон" гэж уцаарлахын оронд "Би танд хайртай" гэж хэлэх байсан юм.

Хэрэв би тантай хамгийн сүүлийн удаа нэг өдрийг өнгөрөөж байгаагаа мэдсэнсэн бол найзуудтайгаа утсаар ярьж, зурагт үзэж суухын оронд тантайгаа илүү дотно ярилцаж, гадуур хамтдаа зугаалах байсан юм.

Хэрэв би танд үнсүүлэх боломж дахин хэзээ ч олдохгүй гэдгийг мэдсэнсэн бол дуртай дургүй хацраа өгөхийн оронд ханатлаа эрхэлж, хэдэн мянган удаа үнсүүлэх байсан юм.

Хэрэв би таныг нэг л өдөр ингээд нисээд явчихна чинээ санасан бол ажил ихтэй гэж яарахын оронд өвөрт чинь хамт хэвтээд үнэрийг чинь үнэрлэж хэвтэх байсан юм.

Танд хоёрдахь боломж олдохгүй байж мэдэх юм. Магадгүй энэ л өдөр танд дотны хүнтэйгээ хамт байх сүүлчийн боломж байж болох юм. Иймээс өдөр бүрийг үнэ цэнэтэйд тооцож хайртай хүмүүстээ өөрийгөө зориулаарай. Маргааш гэж хүлээхийн оронд өнөөдөр яагаад хийж болохгүй гэж? Хөгшин, залуу хэнд ч байсан маргааш гэдэг өдөр олдох эсэхийг хэн ч мэдэхгүй шүү дээ. Тиймээс эргээд харамсахгүйн тулд энэ өдрийг хайраар дүүрэн өнгөрүүлээрэй.


Info TV сэтгүүлээс...
READ MORE - Хэрэв би мэдэж байсансан бол...

Wednesday, November 24, 2010

Арслын хулгана хоёр



Араатны хаан арслан ав хийгээд ихэд ядарсан тул үүрэндээ ирж унтаж гэнэ. Гэтэл нэг хулгана дээгүүр доогуур нь гүйгээд түүнийг ер унтуулсангүй. Арслан сэрээд хулганыг бариад авчээ. Уурандаа хулганыг яг базаж алахын даваан дээр хулгана өршөөл эрэн гуйж гэнэ.
-Намайг битгий алаач. Магадгүй хэзээ нэгэн өдөр би танд тус болох ч юм бил үү гэв. Хулганы хэлсэн үгийг сонсоод арслангийн инээд нь хүрч
-Чи ийм жижигхэн байж надад яаж тусалж чадах вэ дээ. Гэхдээ яахав чамайг энэ удаа амьд үлдээе гэжээ.
Энэ явдлаас хойш хэсэг хугацаа өнгөрсний дараа нэгэн өдөр арслан анчдын тавьсанд торонд орчихож гэнэ. Хичнээн үсэрч, цовхрон архирсан ч торноос гарч чадсангүй. Гэтэл өнөөх амийг нь өршөөсөн хулгана тэр хавиар явж байгаад арсланг олж харав. Тэгээд түүн дээр очин шууд л шүдээрээ торыг мэрсээр байгаад арсланг торноос нь чөлөөлжээ. Хулгана арсланд хандан
-Та намайг жижигхэн гэж голж байсан. Харж байгаа биз дээ, би таны амийг аварч чадлаа шүү дээ гэжээ.
Арслан үүнээс хойш ямар ч жижиг тусын хариу ирдэг юм байна гэдэгт итгэдэг болжээ.


Сургамжит өгүүллэг 3-аас...
READ MORE - Арслын хулгана хоёр

Wednesday, November 10, 2010

Хайрын тодорхойлолт



Сэтгэл судлалын багийнхан 4-8 насны хүүхдүүдэд "Хайр гэж юу вэ?" гэсэн асуултыг тавьжээ. Хариултууд тэдний төсөөлж байснаас ч илүү өргөн, гүн утгатай байсан юм.

Хүүхдүүд хайрыг чухам юу гэж боддог юм бол?
1. "Манай эмээ үе мөчний өвчтэй болохоор хөлийн хумсаа будаж чаддаггүй. Өвөөгийн гар нь бас үе мөчний өвчнөөс болж өвддөг болсон ч гэсэн эмээгийн хумсыг будаж өгдөг. Энэ бол хайр." Ребека 6 настай

2. "Хэн нэгэн чамайг хайрлаж байвал нэрийг чинь бусдаас нэг л зөөлхөн дууддаг. Тэд чиний нэрийг ингэж дуудахад чи аюулгүй байгаагаа мэдэрдэг. Энэ бол хайр." Билли 4 настай

3. "Хайр бол эмэгтэй нь үнэртэй ус түрхээд, харин эрэгтэй нь сахлын ус түрхээд бие биенийгээ үнэртэхээр гадагшаа гарахыг хэлдэг." Карл 5 настай

4. "Хайр бол таныг ядарсан үед инээлгэж чаддаг." Тэрри 4 настай

5. "Ээж маань кофе чанаад аавд өгөхөөсөө өмнө амттай болсон эсэхийг нь шалгадаг. Энэ бол хайр." Дэнни 7 настай

6. "Хайр бол хэн нэг нь чамайг үргэлж үнсэхийг хэлдэг. Хэрвээ чи үнсүүлээд ядарвал ханатлаа ярьж болно. Тэр чамайг дуртайяа сонсоно." Эмили 8 настай

7. "Ээж маань надад маш их хайртай. Учир нь хэн ч намайг унтах бүрд минь ээж шиг минь үнсдэггүй." Клара 6 настай

8. "Чи гөлгөө өдөржин ганцааранг нь үлдээсэн байлаа ч чамд эрхэлж байвал энэ хайр мөн." Мэри 4 настай

9. "Хэрвээ чи дурласан бол нүдэнд чинь оч гялалзана. Энэ бол хайр." Кэрин 7 настай

10. "Хэрвээ чи хайргүй бол хэзээ ч битгий БИ ЧАМД ХАЙРТАЙ гэж хэлээрэй. Харин хайртай бол энэ үгийг дандаа хэлж байх хэрэгтэй." Жессика 8 настай

Эцэст нь энэ санал асуулгын үр дүнд жинхэнэ хайр гэж юу болохыг харуулсан 4 настай хүүг ялагчаар тодруулсан юм. Хүүгийн хөрш болох хөгшний эхнэр нь нас бараад удаагүй байсан ажээ. Хөгшин эрийг уйлж байхыг хараад хүү хашаанд нь орж, өвөр дээр гараад удаан сууж гэнэ. Хүүг гэртээ орж ирснийх нь дараа ээж нь "Чи түүнд юу гэж хэлсэн бэ?" гэж асуухад хүү "Юу ч хэлээгүй ээ. Би зүгээр л түүнийг уйлахад нь хань болж тусалсан юм" гэжээ. Энэ бол жинхэнэ хайр биш гэж үү?

Info TV сэтгүүлээс...
READ MORE - Хайрын тодорхойлолт

Аз жаргал



Эцэг муур сүүлээ барихыг оролдон тоглож суугаа зулзагаасаа
-Яагаад сүүлээрээ тоглоод байгаа юм бэ гэж асуухад зулзага нь
- Муур бидний хувьд хамгийн сайхан зүйл бол аз жаргал, тэр аз жаргал нь бидний сүүл гэдгийг би мэдлээ. Үүнийг барих болгондоо би өөрийгөө аз жаргалтай болсон гэж боддог гэж хариулав. Эцэг муур түүнд
-Би ч гэсэн чам шиг залуу байхдаа яг ингэж боддог байсан. Гэвч хожим би үүнийг олж мэдсэн юм.
"Түүний араас хөөцөлдөх тусам тэр надаас холддог. Харин бид өөрийнхөөрөө амьдрах үед аз жаргал өөрөө аяндаа бидэнд ирдэг юм."
Цаг нь болохоор аз жаргал таныг өөрөө олоод ирэх болно. Тиймээс та өөрийнхөөрөө л амьдрахад болно. 


Сургамжит өгүүллэг 3-аас...
READ MORE - Аз жаргал

Monday, November 8, 2010

Хайрын 100 өдөр



Хоёр найз цэцэрлэгт хүрээлэнд ярилцан сууна.

Бүсгүй: Би уйдаад байна. Найз залуутай болж, үргэлж хамтдаа байх юмсан.
Залуу: Болзох хүнтэй бол би лав энд ингэж сууж байхгүй... (Уртаар санаа алдав.)
Бүсгүй: Хоёулаа нэг тоглоом тоглох уу? Тэгвэл сонирхолтой байж болох юм.
Залуу: Тоглоом оо, ямар тоглоом гэж?
Бүсгүй: Тун энгийн. 100 өдөр чи миний найз залуу бол. Энэ 100 өдөр би чиний найз бүсгүй болъё.
Залуу: Сонирхолтой л юм. Цаг ч зугаатай өнгөрөх байх.
Бүсгүй: За тэгвэл өнөөдөр эхний өдөр нь шүү. Бас бидний анхны болзоо. Юу хийх үү?
Залуу: Хосууд кино үздэг биз дээ. Сайхан кино гарч байгаа гэсэн. Хоёулаа кино театр орвол ямар вэ?
Бүсгүй: Тэгье. Надад чинийхээс дээр санаа алга.

Шинэхэн хос анхны болзоогоо ингэж эхэлжээ.

2 дахь өдөр
Тэд концерт үзэж, залуу нь бүсгүйдээ гялалзсан одтой түлхүүрийн оосор бэлэглэв.

3 дахь өдөр
Тэд нэг найзынхаа төрсөн өдөрт зориулж бэлэг худалдан авахаар дэлгүүр орохдоо мөхөөлдөс идэж, анх удаа бие биенийгээ тэврэв.

7 дахь өдөр
Тэд уулан дээр гарч нар жаргахыг харав. Шөнө болж, тэргэл саран орчныг гэрэлтүүлж, одод түгэх хүртэл тэд өвсөн дээр хэвтлээ.

25 дахь өдөр
Залуу бүсгүйгээ дагуулан цэцэрлэгт хүрээлэнгээр зугаалж, хөвөн чихэр авч өгөв. Айдсын агуйд тэд гар гараасаа атган явлаа.

67 дахь өдөр
Тэд цирк үзэхээр явлаа. Циркийн одой алиалагч бүсгүйн тусламжийг авахаар тайзанд урихад залуу инээдээ барьж ядан сууна. Тоглолт дууссаны дараа циркийн гадаа сууж байсан мэргэч эмэгтэй тэр хоёрын гарыг хараад “Энэ цаг үеэс эхлэн хором бүрийг хайрлаж яваарай” гэж хэлээд босоод явчихав. Тэд юу ч ойлгосонгүй. Оюун санаа нь эрүүл бус хүн байна гэж тэд ярилцаад инээлдэн цааш алхлаа.

84 дэх өдөр
Нар жаргаж байх үед тэд анх удаа үнсэлдлээ. Шөнө дунд болтол үзэсгэлэнт оддыг ширтэн харж, элдвийг ярилцан суув. Од харвахад бүсгүй дотроо юуг ч юм хүсэн шивнэжээ.

99 дэх өдөр
Энэ өдрийг тэд энгийнээр өнгөрөөхийг хүслээ. Хотын гудамжаар алхаж, цэцэрлэгт хүрээлэнгээр зугаалж, сандал дээр очиж суув.

13 цаг 23 минут
Бүсгүй: Миний ам цангаад байна.
Залуу: Эндээ хүлээж байгаарай. Би уух юм аваад ирье. Юу уумаар байна?
Бүсгүй: Хүйтэн ундаа л уумаар байна.

13 цаг 45 минут
Бүсгүй 20 гаруй минут хүлээсэн боловч залуу ирсэнгүй. Гэтэл нэгэн танихгүй хүн маш их сандарсан байдалтай бүсгүй дээр хүрч ирэн “Гудамжны төгсгөлд согтуу жолооч нэг залууг мөргөөд зугтаачихлаа. Тэр залуу чамайг энд байгаа гэж надад хэллээ” гэж хэлэхийг сонсоод бүсгүй хар хурдаараа гүйлээ. Бүсгүй үл таних хүний заасан гудамжаар дөнгөж эргэтэл залуу зам дээр хэвтэж байгаа харагдав. Түүний толгойноос гарсан цус зам дээр урсаж байсан ч, ундаагаа гартаа чанга атгасан байлаа. Түргэн тусламжийн тэрэг ирж, залууг авч явахад бүсгүй ч эмнэлэг дээр хамт очив. Бүсгүй эмнэлэгт өдөржин уйлж хүлээжээ.

23 цаг 51 минут
Эмч: Уучлаарай, бид чадах бүхнээ хийлээ. Одоохондоо амьд байгаа ч гэсэн хүнд гэмтлээс болоод ямар ч найдваргүй болсныг хэлэхэд тун харамсалтай байна. Бид түүний халааснаас энэ захидлыг олсон юм. Чамд очих ёстой гэж бодож байна.
Эмч бүсгүйн гарт захидлыг атгуулаад залуу дээр орохыг зөвшөөрлөө. Бүсгүй нулимсаа барьж ядан залууг харахад яг л унтаж байгаа мэт тайван харагдана. Бүсгүй арай ядан захидлыг задлан уншлаа.

“Тун удахгүй бидний 100 дахь өдөр болно. Чамтайгаа хамт байсан болохоор энэ бүх л өдөр надад хэзээ ч мартагдахааргүй өнгөрсөн. Хэдийгээр чи заримдаа уйтгартай, бодлогшронгуй байдаг ч миний амьдралд жаргал авчирсан юм шүү. Өнгөрсөн хугацаанд чамайг миний жинхэнэ хайр байсныг мэдээгүй явсандаа харамсаж байна. Дэргэд минь үүрд байгаач. Би чамд хайртай...”

23 цаг 58 минут
Бүсгүй: Хайрт минь, од харвахад намайг юу хүссэнийг мэдэх үү? (Ихэр татан уйлав.) Бидний 100 өдөр үүрд үргэлжлээсэй гэж хүсэн залбирсан юм. 100 өдрөө үүрд үргэлжлүүлье, намайг битгий орхиоч дээ хайрт минь. Би чамд хайртай, хайртай шүү дээ. Энэ үгийг хэлэх боломж өгөөч...

Цагийн зүү 12-ыг заахад залуугийн зүрх цохилохоо болив. Энэ нь тэдний 100 дахь өдөр байсан юм.

Жич: Жинхэнэ хайрын нууц нь нөхөрлөлийн хүч юм. Тиймээс жинхэнэ хайраа олохын тулд жинхэнэ нөхөрлөлийг олох хэрэгтэй. Хэн нэгнийг үнэн сэтгэлээсээ хайрлахын тулд түүнийг хэрхэн харагдаж байгаагаар нь биш, харин байгаа хэвээр нь хайрлах хэрэгтэй. Нөхөрлөл бол хайрын үрийг соёолуулдаг хөрс юм. Харьцаандаа хайр бий болгохыг хүсвэл эхлээд нөхөрлөлийг бий болгоорой. Үүрдийн хайр дэргэд чинь байдаг юм шүү.


Info TV сэтгүүлээс...
READ MORE - Хайрын 100 өдөр

Friday, November 5, 2010

Зүүд



Нэгэн багш ангийнхаа хүүхдүүдийн зүүдэнд ажиглалт хийж гэнэ. Зүүд зүүдлэх нь хүний биеийг ямар их тайвшруулж, хүнд ямар их хэрэгтэй болохыг мэдсэнийхээ дараа сурагчдаасаа 
-Урьд шөнө та нар юу зүүдлэв гэж асуув.
Хүүхдүүд гараа өргөн нэг нэгээрээ зүүдээ ярив. Тэдний ихэнх зүүд нь хэд хоногийн өмнө талбай дээр осолдсон онгоцтой холбоотой байлаа. Бас эхнэр хүүхдээ зам дээр хутгалж хөнөөсөн тэтгэврийн хөгшний тухай зүүдэлсэн байв.
Багш хамгийн арын ширээнд суугаа сурагч гараа өргөөгүйг анзаарсан тул түүн дээр дөхөж очин
-Али, чи юу зүүдэлсэн бэ? Чи арай зүүд зүүдэлдэггүй юм биш биз дээ? гэж асуув.
Хүүгийн хацар нь улайн, ичингүйрч
-Зүүдэлсэн л дээ. Гэхдээ миний зүүд их өөр гэхэд багш нь
-Тэгвэл бидэнд зүүдээ ярьж өгөөч. Зүүд бүхэн адилхан байх албагүй шүү дээ.
-Би өвөөтэйгөө загас барихаар явснаа зүүдэлсэн. Бид хоёр маш том загас барьсан. Тэгээд гэртээ харьсан гэв.

Багш дараа долоо хоногт зүүдтэй холбоотой хичээлээ цааш нь үргэлжлүүлэв. Тэр долоо хоногт хүүхдүүдийн зүүдэлсэн зүүдний ихэнх нь нефтиэр баялаг нэгэн хотод болсон тэсрэлтэд хэдэн зуун хүүхэд өртсөн тухай, мөн нэгэн алдартай дуучин хөлөндөө буудуулсан тухай, бас нэгэн бизнесмен залуу барьцаалагдсан тухай байлаа.
Багш хамгийн арын ширээнд суугаа Али мөн л гараа өргөөгүйг мэдээд хажууд нь очин юу зүүдэлснийг нь асуув. Хүү цонхоор цасанд хучигдсан уул өөд харан
-Өнгөрсөн долоо хоногт манай олон хонь төллөсөн. Би зүүдэндээ хонио уулын бэлд байдаг горхи руу дагуулж явсан. Тэгээд тэнд цэцэгстэй ярьж, тэнгэрт дүүлэн нисэх шувуудтай уралдсан. Би яг л шувуу шиг нисэж байсан гэв.

Багш ажиглалтаа лавшруулан цааш судлахад Алигийн дүү нар ч адил зүүд зүүдэлсэн байв. Тэр ч бүү хэл өвөөгийнх нь зүүд хүртэл төстэй байжээ. Тэгээд багш ихэд сонирхон
-Үргэлж иймэрхүү зүүд зүүдэлбэл их сонирхолтой юм. Бүгд яг л кино шиг юм. Эсвэл ийм зүүд зүүдлэх ямар нэг шалтгаан байдаг юм уу? гэж Алигаас асуухад хүү инээмсэглэн
-Мэдэхгүй ээ багш аа. Зурагт авах чадалгүй ядуу болохоор Бурхан бидэнд ийм гоё кино шиг зүүд зүүдлүүлдэг байх гэжээ.


Сургамжит өгүүллэг 2-оос...
READ MORE - Зүүд

Friday, October 29, 2010

Реклам



Хаврын нэг сайхан өдөр Бруклины гүүрэн дээр нэгэн хараагүй хүн гуйлга гуйгаад сууж байв. Тэрээр энгэртээ "Төрөлхийн сохор" гэсэн пайз зүүжээ. Хүмүүс хараагүй гуйлгачны дэргэдүүр зүгээр л өнгөрч байв. Үүнийг ажигласан реклам сурталчилгааны нэгэн ажилтан пайзных нь ар талд нэг зүйл бичиж, бичсэн талаа хүмүүс рүү харуулж тавиад явжээ. Гэтэл хараагүй гуйлгачны хажуугаар өнгөрсөн хүн бүр мөнгө тавьж эхлэв. Гол нууц нь сурталчилгааны ажилтны бичсэн ганц өгүүлбэрт байлаа. Тэрээр "Цэцэг навч нахиалсан хаврын сайхан өдөр... Гэтэл би хаврыг харж чадахгүй байна." гэж бичжээ.


Сургамжит өгүүллэг 2-оос...
READ MORE - Реклам

Tuesday, October 26, 2010

Хясааны нулимс



Шүрэн ойн дунд нэгэн бяцхан хясаа амьдардаг байжээ. Хажуугаар нь өнгөрөх өнгө өнгийн гоёмсог загасыг харан өдөр хоногийг өнгөрөөдөг байв. Амгалан тайван амьдралтай энэ бяцхан хясааны амьдрал нэг өдөр хар дарсан зүүд мэт аймшигтай болон хувирав.

Учир нь гаднах ясан бүрхүүлээ бага зэрэг онгойлготол биен дотор нь нэг элсний ширхэг орж, хамаг биеийг нь холгож эхлэв. Бяцхан хясаа эхэндээ удахгүй гарчих байх гэж бодоод нэг их тоосонгүй. Гэвч өдөр ирэх тусам элсэн ширхэг улам бүр шигдсээр байлаа. Ингэх тусам түүний бие маш их өвдөж шаналах болов. Тэрээр шаналсандаа өдөр бүр уйлж, хөөрхий хясааны нулимс нэмэгдсээр л байв.

Юунд хэрхэн гомдохоо мэдэхгүй байлаа. Өөрийг нь зовоож байгаа элсэн ширхэгт үү? Эсвэл анхаарал болгоомжгүй байсан өөртөө юү? Өөрийг нь хамгаалж чадаагүй далай тэнгист үү?
Хөөрхий хясаа алинд нь ч гомдож чадсангүй. Өвчин нь бага зэрэг намжиж, өөрөө ч бага зэрэг тайвширсан нэг өдөр ингэж боджээ.

"Нэгэнт би тэр элсийг гаргаж чадахгүйгээс хойш түүнтэй хамт амьдрахад дасах нь зүйтэй юм байна. Хэн нэгэнд гомдоод ч яах билээ дээ."

Он жилүүд өнгөрсөөр хөөрхий хясаа асар их тэвчээр гарган элсэн ширхэгтэй хамт амьдарчээ. Маш их өвдөж, уйлдаг байсан ч гомдоллохоо больж гэнэ. Ингээд он удаан жил хөөрхий хясааг зовоосон өнөөх элсэн ширхэг асар их тэвчээрийн үр дүнд гайхамшигт тансаг сувд болон хувирчээ. Ингэж зовсон хясааны нулимс элсэн ширхэгийг бүрхсээр гайхамшигтай сайхан сувд болгосон юмсанжээ.

Далайн амьтад хясааны дэргэдүүр өнгөрөх бүрдээ гайхамшигт сайхан сувдыг нь гайхан шагширч, түүний асар их тэвчээрийг нь магтан сайшаадаг болжээ.

Бяцхан хясааны амьдралыг үлгэр жишээ болгон хэцүү санагдаж байгаа зовлон бэрхшээлийг даван туулж сувд болгох боломж хүмүүс бидэнд ч байгаа шүү дээ.


Сургамжит өгүүллэг 3-аас...
READ MORE - Хясааны нулимс

Tuesday, October 19, 2010

Тана цэцэг



Шүүхийн танхимд чимээгүй суух наяад насны хөгшин хосын байдал элэг эмтрэм хөөрхийлөлтэй байлаа. Өвгөн нь зөрүүд загнан дуугаа хураан сууж буй ядрангуй эмгэнээ холоос нууцхан ширтэж суув. Шүүгч баргил хоолойгоор хөгшин эмэгтэйгээс 
-За эгч минь, яагаад гэрлэлтээ цуцлах хүсэлтэй байгаа билээ? гэж асуухад хөгшин эмэгтэй гүнзгий гэгч нь санаа алдаад сөөнгө хоолойгоор
-Энэ өвгөнөөс залхаж гүйцлээ. Одоо хангалттай. 50 жилийн турш намайг амьдралаас залхааж орхилоо хэмээн хариулав.
Шүүх танхим хэсэг дуугүй болж хэн ч дуугарсангүй. Энэ чимээгүй байдлыг иймэрхүү мэдээллийг сонинд томоор гарчиглан олон нийтэд цацдаг нэгэн сэтгүүлчийн зураг авах чимээ эвдлээ. Тэднийг сонинд юу гэж бичихийг хэн мэдэх билээ. 50 жилийн хамтын амьдрал хэрхэн төгсөх гэж байгааг хэвлэл мэдээллийнхэн чих тавин чагнаж суулаа... Тэнд байсан бүх хүний анхаарал хөгшин эмэгтэйн хачирхалтай ярианд хандсан байв.

Нүдэнд нь нулимс цийлэгнэсэн хөгшин эмэгтэй
-Манайд нэг тана цэцэг байсан юм. Би түүнд маш их хайртай байсан. Тэр мэдэхгүй ээ... 50 жилийн өмнө болсон явдал л даа... Тэр цэцгийг би түүний надад өгсөн амьд цэцгийн баглаанаас үрслүүлж тарьсан юм. Бидэнд хүүхэд заяагаагүй учраас би тэр цэцгээ хүүхэд шиг л хайрладаг байв. Хэсэг хугацааны дараа цэцэг маань хатаж эхэлсэн. Тэр үед би дотроо "Шөнө бүр босож, үүр цайхаас өмнө нэг сав усаар цэцгээ усална" хэмээн өөртөө амласан юм. Ингэх нь их сайн хэмээн хүмүүс ярьдаг байсан юм. 50 жил болоход энэ хөгшин тэр шөнөөс өмнө нэг ч удаа шөнө босож цэцгийг чинь усалж өгөе гэж хэлээгүй... Тэр шөнө би их ядарсан учраас нам унтсан байлаа. Би ийм л хүнтэй 50 жилийг өнгөрүүлж дээ. Би түүнд амьдралаа, итгэл найдвараа бүгдийг нь зориулсан. Түүнээс би сайн юм үзсэнгүй. Өөрийнхөө хийдэг ажлаас нэгийг нь ч хийгээд өгөөсэй гэж хүлээж байгаагүй. Би үнэхээр түүнгүйгээр илүү сайн явна. Амлаж байна гэж хэлэхэд шүүгч хөгшин эр рүү харан 
-Ах минь, танд хэлэх зүйл байна уу? гэв. Хөгшин өвгөн таягаа тулан болож, гэмшсэн байдлаар шүүгч өөд харав. Тэгээд аажуухнаар
-Би цэргийн албаа ерөнхийлөгчийн ордны цэцэрлэгчийн албанд хаасан юм. Тэр цэцэрлэгийг амьд сайхан байлгахын төлөө чадах бүхнээ л хийдэг байлаа. Би эхнэрээ болон тана цэцгийг тэнд л таньсан юм. Түүнд би хамгийн сайхан цэцгийн баглааг өгдөг байв. Түүнтэйгээ гэрлээд удаагүй байтал түүний хүзүү нь өвдөж, бид эмчид хандсан. Эмч түүнийг олон цагаар унтвал хүзүүнийх нь шохойдолт ихэсч, байдал улам бүр муудах болно гэж хэлсэн юм. Шөнө бүр нойрноосоо сэрж, хэсэг хугацаанд алхаж, гишгэх хэрэгтэй гэж зөвлөсөн. Эмчийн зөвлөгөөг манай хүн төдийлөн тоохгүй байлаа. Өчнөөн удаа хэлээд дийлсэнгүй. Тэр үед аз болоход цэцэг маань хатаж эхэлсэн юм. Би түүнд энэ цэцгийг сайн усалбал сайн ургадаг гэж зөвлөлөө. Үүнийг хийхийн тулд өөртөө амлах хэрэгтэй байв. Шөнө болгон түүнийг сэрээж, түүнийг харж хэвтдэг байлаа. Хамгаас хайртай бүсгүйнхээ хүүхэд шигээ хайрладаг цэцгээ услаж байхыг нь харахад сайхан байдаг байв. Тэгээд яриагаа цааш үргэлжлүүлэн
-Шөнө болгон түүнийг унтсаны дараа би босдог байлаа. Цэцгийн савнаас усыг нь асгахын тулд шүү дээ. Учир нь тана цэцэг усанд дургүй юм шүү дээ шүүгч минь... Тэр шөнө хөгшин би  унтаж сэрж чадалгүй унтаж орхисон юм. Цэцгийг услахгүй байж болох байсан ч эхнэрийн минь хүзүү дахин өвдөж болзошгүй байсан учраас үүнд өөрийгөө буруутган гэмшиж, би түүнд юу ч хэлээгүй юм... гэв.

Яг тэр мөчид шүүхийн танхимд байсан сэтгүүлчид болон бусад бүх хүн өөрийн эрхгүй уйлж байлаа.


Сургамжит өгүүллэг 3-аас 

READ MORE - Тана цэцэг

Thursday, October 14, 2010

Харагдаж байгаа шигээ биш



Хоёр тэнгэр элч дэлхий рүү буун хүний ертөнцөөр аялахаар шийджээ. Мэдээж жирийн хүний дүрээр аялж эхлэв. Эхлээд хотын хамгийн сайхан харшийн үүдийг тогшин хонох зөвшөөрөл эрэхэд гэрийн эзэн тэднийг ярвайн угтаж, хоол ундаар ч дайлалгүй тохилог халуун зочдын өрөөнд оруулахын оронд харанхуй чийгтэй зоорь луу оруулан "Шөнийг наанаа өнгөрөөчихөөд өглөө хурдхан яваарай" гэж хэлж гэнэ. Нимгэн дэвсгэрээ хүйтэн шалан дээр дэвсэн хэвтэхийг завдаж байгаад насаар арай ахимаг тэнгэр элч нь зоорины хана нурах дөхсөнийг анзаарчээ. Хуучин хананд гараа хүргэтэл өнөөх хана тэр даруй шинэхэн өрсөн мэт бат бөх болон хувирав. Залуу тэнгэр элч учрыг асуутал "Бүх зүйл цаанаа ямар нэгэн учиртай. Тиймээс аливаа зүйлийг өнгөн талаас нь бүү хар" гэжээ.

Маргааш орой нь хоёр тэнгэр элч хөдөөний нэгэн айлд хонох зөвшөөрөл эрэн хаалгыг нь тогшиж гэнэ. Тэднийх амжиргааны ганц үнээтэй тул түүнийхээ сүүг саан хотод аваачиж заран амь зогоодог байжээ. Гэрийн эзэд тэднийг гэртээ оруулан тарчигхан ширээндээ гийчдийг урин хамаг байдгаараа дайлж гэнэ. Унтах цаг болоход гэрийн эзэгтэй "Та бүхэн холоос ирсэн явуулын хүмүүс тул орон дээр унтагтун. Бид энүүгээр учраа олоод унтчихна" хэмээн хэлээд дулаахан сайхан ор засаж өгөв. 

Нар мандаж өглөө болж, хоёр зочныг сэрэхэд үнээ нь үхчихсэн хэвтэж байв. Эхнэр нөхөр хоёрын цөхрөнгөө баран уйлж суухыг харсан залуу тэнгэр элч ахмаддаа уурлан 
-Өнгөрсөн шөнийн айл баян мөртлөө биднийг тээршааж байхад та тэдний хуучирсан ханыг засчихаад, харин энэ эхнэр нөхөр хоёр биднийг тав тухтай байлгах гэж хамаг байдгаараа хичээж байхад ийм сайхан хүмүүсийн ганц үнээг яагаад үхүүлэв" гэхэд ахмад элч 
-Аливаа зүйл заавал өнгөн талдаа харагдаж байгаа шигээ байх албагүй" гэж хариулжээ. 
-Таны юу гэх гээд байгааг сайн ойлгосонгүй. Тэгээд яг ямар учиртай юм бэ хэмээн залуу тэнгэр элчийг ууртай асуухад ахмад тэнгэр элч
-Аливаа зүйл заавал өнгөн талдаа харагдаж байгаа шигээ байх албагүй хэмээн давтаж хэлээд "Эхний хоносон айлын нурах дөхсөн хананы цаана олон жилийн өмнө нуусан алт эрдэнэс байсан юм. Тэр хүмүүс баян цатгалан ч харамч хомхой улс байсан учраас тэр эрдэнэсийг авах эрхгүй. Тийм учраас би тэр нурах дөхсөн ханыг зассан юм. Харин өнгөрсөн шөнө эрлэгийн элч энэ айлын эхнэрийг авахаар ирэхэд нь би эзэгтэйн амины оронд үнээний амийг авахыг санал болгосон. Хэрвээ тэгээгүй байсан бол өнөө өглөө айлын эзэгтэй байхгүй байх байсан" хэмээн тайлбарлажээ.

Заримдаа золгүй муу явдал мэт харагдах зүйлийн цаана ямар нэгэн сайн учир шалтгаан агуулагдаж байж болох юм.


Сургамжит өгүүллэг 3-аас...
READ MORE - Харагдаж байгаа шигээ биш

Thursday, October 7, 2010

Аавын тайтгарал



Манайхан гэр бүлээрээ аяллаар яваад ирэх замдаа автын осолд орсон юм. Тэр ослоос хойш би хоёр таяггүй алхаж чадахаа больж, надаас арай дээр боловч аав ч гэсэн хоёр таяггүй явж чадахгүй болсон юм. 

Идэр насандаа хоёр хөлгүй болсон би өвдсөн сэтгэлээ нуун амьдрах хичнээн хэцүү болохыг үгээр хэлж чадамгүй билээ. Үхмээр санагдсан ч хажуугаар нь өрсөлдөх сэтгэл бий болж байв. Найз нөхөд маань хүртэл таягийг минь хараад хэн нэгний тоглоом мэт "Яана аа, ирээдүй нь дардан сайхан байсан хүн одоо бүр хүн биш болжээ яана даа" хэмээн шивнэлдэхэд тэр үг нь миний сэтгэлийн гүнд үлдэж, мөн ч их уйлсан даа. Гэвч надтай адилхан зовлон амсаж байгаа аав минь тэр мөч бүхэнд надад
-Сү Жин ээ, аав нь бүгдийг ойлгож байна хэмээн тайтгаруулдаг байлаа. Аавынхаа энэ хайрын хүчээр би өсвөр насаа үдэж, ахлах сургуулиа төгсөөд дээд сургуульд орох өдөр ирсэн юм. "Аав нь охиноороо үнэхээр бахархаж байна" гэж хэлсэн аавын минь нүдэнд нулимс цийлэгнэж байлаа. 

Элсэлтийн арга хэмжээ дуусаад гарч явах үед сургуулийн гадаа олон хүн бужигнаж, хажуугаар өнгөрөх машинууд хурдаа хасалгүй явж байв. Гэтэл нэг жаахан хүүхэд машины өмнүүр гүйж орхилоо. Бүгд дуу алдав.
-Яана аа, тэрийг!
Бүгд юу болохыг түгшин харж байтал аав маань тулж явсан таягаа хаяад тэр хүүхдийг чиглэн гүйлээ. Би нүдэндээ ч итгэж чадсангүй. Аав нөгөө жаахан хүүхдийг тэврэн гарцаар гарч ирж яваа харагдав. 
"Аав аа...!"
Би гайхсандаа хашхирсан боловч олны дунд орсон аав минь миний дууг сонссонгүй. 
-Ээж ээ, ээж та ч гэсэн харсан биз дээ? Аав алхаад...
-Сү Жин аа, ээжийнхээ үгийг сайн сонс. Хэзээ нэгэн цагт чамайг мэднэ гэж бодож байсан юм. Үнэндээ аав нь таяггүй явж чадахаар эрүүл хөлтэй. Осол гарсан тэр өдөр аавын чинь гар л гэмтсэн. Гэвч чиний сэтгэлийг ойлгохын тулд дөрвөн жилийн турш чиний өмнө таягтай явж байсан юм. Хамтдаа өвдөж байж, өвчтэй чамайг тайтгаруулахын тулд шүү дээ. 
-Яагаад тэгсэн юм бэ? Яагаад аав хүртэл... би өөрийн эрхгүй уйлж орхилоо.
-Битгий уйл. Аав нь чамайг тайтгаруулж байгаадаа хичнээн их сэтгэл хангалуун байсан гээч. Үнэндээ ээж нь хүртэл тэгж аавыг чинь хараад дэндүү сүртэй юм гэж хэлсэн боловч тэр болгонд аав чинь зүгээр л инээмсэглэж байсан.
-....
-Энэ аавын чинь сэтгэл татам тал биш гэж үү? Үнэндээ аавын чинь энэ байдлыг хараад улам их хайрлах болсон. 
-...
-Өнөөдөр ч гэсэн тэр жаахан хүүхдийг автын осолд ороод чам шиг болчих вий гэсэндээ л хурдхан шиг таягаа хаяад гүйсэн байх.
-Ээж ээ, аавд муу юм тохиолдох вий гэхээс зүрх хагарчих шахлаа...


Гэр бүл-Аз жаргал сэтгүүлээс...
READ MORE - Аавын тайтгарал

Thursday, September 30, 2010

Модон морь

Хоёр хүүхэдтэй нэгэн гэр бүл байжээ. Тэд амралтын өдөр гэр бүлээрээ салхинд гарахаар болов. Нэгэн сайхан үзэсгэлэнтэй газар очоод ээжийгээ хоол унд бэлдэж байх зуур хүүхдүүд нь аавынхаа хамт орчин тойронтойгоо танилцахаар явав. 

Тэд маш хол газар алхсан учир бага хүүхэд нь явдалдаа ядарч, аав руугаа өрөвдөлтэй харцаар харан
-Аав аа, би маш их ядарч байна. Намайг тэврээд яваач гэхэд аав нь ганц ч үг хэлэлгүй модноос нэг мөчир таслан авч хутгаар нямбай гэгч нь өөлөөд хүүхдэдээ хандан
-Үүнийг ав. Чамд сайхан морь бэлдээд өглөө гэж хэлэв.

Хүү нь морио баяр хөөртэйгөөр унан ээж рүүгээ гүйлээ. Аав, эгч хоёрыгоо хол орхисон байв. Аав  нь охин руугаа харан инээмсэглээд
-Охин минь, энэ бол амьдрал. Хүмүүс заримдаа сэтгэл санаагаар, заримдаа биеэрээ ядардаг. Тэр үед өөртөө түшиг болох нэг морь олж аваад түүнээсээ эрч хүчээ сэлбэж амьдрах хэрэгтэй. Энэ амьдралд түшиг болох тэр морь чинь чиний дотны сайн найз нөхөр чинь эсвэл нэг сайхан шүлэг, дуу, ном, бүр хүүхдийн инээмсэглэл ч байж болно шүү дээ гэж хэллээ.


Сургамжит өгүүллэг 3-аас...
READ MORE - Модон морь

Tuesday, September 28, 2010

Эх үр


1 настай байхад тань таныг өөрийн гараар хооллож ундлан, угааж цэвэрлэн бүхий л зүйлийг тань хийсэн. Шөнөжин уйлж, нойрыг нь хугаслаж түүнд хариу барьсан.

2 настай байхад тань танд алхахыг зааж өгсөн. Дуудахад нь зугтаж түүнд хариу барьсан.

3 настай байхад тань, танд гараа гарган сайхан хоол хийж өгсөн. Энгэр заам, ширээн доогуураа асган түүнд хариу барьсан.

4 настай байхад тань, гарт тань өнгийн харандаа бариулсан. Зураг зурж байна гээд гэрийн ханан дээгүүр сараачин түүнд хариу барьсан.

5 настай байхад тань, таныг хамгийн хөөрхөн хувцсаар гоёсон. Харсан шавар шавхай болгоноо туучин түүнд хариу барьсан.

6 настай байхад тань, таныг сургуульд чинь хүргэж өгсөн. Гудамжинд "Би сургуульд явахгүй ээ" хэмээн чарлан уйлж түүнд хариу барьсан.

7 настай байхад тань, танд бөмбөг бэлэглэсэн. Хөршийн цонхыг хагалж түүнд хариу барьсан.

8 настай байхад тань, танд төгөлдөр хуурын багш хөлсөлсөн. Нэг ч өдөр болов нотнуудаа цээжлэлгүй түүнд хариу барьсан.

10 настай байхад тань, найзуудын төрсөн өдрөөс авхуулаад бүх л газар таныг машинаар хүргэж өгсөн. Машинаас үсрэн буухдаа эргэж ч харалгүй түүнд хариу барьсан.

11 настай байхад тань, таныг найзтай чинь цуг кинонд дагуулж явсан. "Та бидэнтэй битгий суу, өөр газар суу" хэмээн ундууцаж түүнд хариу барьсан.

12 настай байхад тань, муу үлгэр дуурайлалтай телевизийн хөтөлбөрүүдийг үзэхийг хориглосон. Гадуур гарсан хойгуур нь бүгдийг нь үзэж түүнд хариу барьсан.

15 настай байхад тань, зуслан руу зуны амралтанд явуулсан. Нэг ч мөр захиа бичилгүй түүнд хариу барьсан.

17 настай байхад тань, найз хөвгүүнтэйгээ үдэшлэгт явахыг тань зөвшөөрсөн. Нэг ч удаа утасдалгүй санааг нь зовоож түүнд хариу барьсан.

19 настай байхад тань сургуулийн тань төлбөрийг төлсөн. Сургуулийн хотхонд машинаар хүргэж, ачаа тээшийг тань зөөж өгсөн. Найзууддаа шоолуулахаас ичин сургуулийн үүднээс хурдхан явуулан түүнд хариу барьсан.

21 настай байхад тань, ажил мэргэжил, байр суурийн тань талаар танд зөвлөгөө өгөхийг хүссэн. "Би тан шиг болохыг хүсэхгүй байна" хэмээн ширвэж түүнд хариу барьсан.

22 настай байхад тань, төгсөлтийн баярт тань ирж бахархалтайгаар таныг тэврэн үнссэн. Төгсөлтийн зугаалгын мөнгө нэхэн түүнд хариу барьсан.

24 насанд тань удаан хугацааны турш үерхэж буй найз залуутай тань танилцахыг хүссэн. "Хэзээ танилцуулахаа би мэдье" хэмээн аашилж түүнд хариу барьсан.

25 насанд тань хуримын бүхий л зүйлийг тань бэлдэн таны өмнөөс хамгийн ихээр баярлаж догдолсон. Холоос хол нүүж түүнд хариу барьсан.

30 насанд тань хүүхдийн асаргааны талаар зөвлөгөө өгч тусалсан. "Энэ хоцрогдсон аргуудыг одоо хэрэглэхээ больбол таарна" хэмээн мэдэмхийрч түүнд хариу барьсан.

40 насанд тань тан руу залган ойр дотны нэгэн хамаатны тань төрсөн өдөр удахгүй болох гэж байгааг сануулсан. "Ээж ээ, хийх ажил их байна, амжихгүй" хэмээн түүнд хариу барьсан.

50 насанд тань тэр хүндээр өвчлөн хэвтсэн. Хагас бүтэнсайн өдөр түүн дээр очиход тань маш их баярласан ч хөгшчүүдийн хүүхэд мэт аашилдгийг нь гайхан түүнд хариу барьсан.

Гэтэл нэг л өдөр тэр хорвоогоос хальсан. Тэр мөчийг хүртэл түүнд зориулж хэлээгүй болон хийгээгүй бүхэн тань аянга мэт бууж зүрхийг эмтэлсэн.


Сургамжит өгүүллэг 3-аас
READ MORE - Эх үр

Wednesday, September 22, 2010

Өчигдрөөс хурдан




Өглөө бүр Африкт нэгэн зээр сэрнэ. Толгойд нь ганц л бодол эргэлдэнэ. Хамгийн хурдан давхидаг арслангаас илүү хурдан давхих. Эс бөгөөс арслангийн хоол болно.


Өглөө бүр Африкт нэгэн арслан сэрнэ. Толгойд нь ганц л бодол эргэлдэнэ. Хамгийн хурдан давхидаг зээрнээс илүү хурдан давхих. Эс бөгөөс өлбөрч үхнэ. 

Та арслан ч бай, зээр ч бай өглөө болонгуут давхих хэрэгтэй. Харин давхихдаа өмнөх өдрөөсөө хурдан давхих хэрэгтэй гэдгээ бүү март.

Амьдралын төлөөх чармайлтыг энэ Африк зүйр үг хичнээн сайхан илэрхийлээ вэ. Хэрэв та арслан байгаад өмнөх өдөр хамгийн хурдан давхисан зээрийг барьж чадаагүй бол, мөн өнөөдөр зээр барихыг хүсч байвал нэг зүйлийг ойлгох хэрэгтэй. Хамгийн удаан зээр ч танаас хурдан болохыг. Тэгвэл та өнөөдөр өчигдрөөс илүү хурдан давхиж байж л энэ уралдаанд ялагч болох болно.

Хэрэв та зээр байгаад өчигдөр арслангийн идэш болохоос зайлж чадсан бол, мөн өнөөдөр ч идэш болохыг хүсэхгүй байгаа бол хурдаа өчигдрийнхөөс ихэсгэх хэрэгтэй. Учир нь өнөөдөр таны ээлж ч байж болох юм.

Өөрөөр хэлбэл, амьдралын уралдаанд хоцролгүй үлдэх ганц л зам бий. Өчигдрийнхөөс хурдан давхих... Үүнээс, түүнээс, энэнээс, тэрнээс биш. Харин өчигдрөөсөө л хурдан давхих хэрэгтэй. Та тий байж чаддаг уу?


                                                                                                                      Сургамжит өгүүллэг 3-аас...

READ MORE - Өчигдрөөс хурдан

Таны зүрх сэтгэлийн цаг агаар ямар байна вэ?




Одоо таны амьдралын цаг агаар ямар байна вэ?
Ямар ч үүлгүй цэлмэг байна уу?
Эсвэл манантай бүрхэг байна уу?
Үгүй бол цахилгаан цахиж, бороо орж байна уу?

Сүүлийн үед ойр орчмынхоо хүмүүсийг харахаар борооны хар үүл нүүгэлтсэн тэнгэр харж байгаа мэт санагдаж, сэтгэл өвдөх юм.

Бохир агаар, завгүй амьдралд энд тэндгүй шидэгдэх бидний биес аль хэдийн анхааруулах дохио анивчуулж, дээр нь бидний сэтгэл санаа хар салхинд дайруулсан аятай онцын шалтгаангүй боловч уйтгарладаг болжээ. Бид сэтгэлийн шархаар дүүрч, хэрэв хэн нэгэн жаахан л гар хүрэх юм бол шууд тэсрэхэд бэлэн байгаа бөмбөг шиг болчихсон байх юм. Бүрхэг өдөр, бохирдсон агаар мэт бидний сэтгэлийг дахин цэлмэг болгож болох болов уу? Намрын намуухан өдрүүд таны бие болоод сэтгэлийг цэлмэг болгох болтугай.


Гэр бүл-Аз жаргал сэтгүүлээс...
READ MORE - Таны зүрх сэтгэлийн цаг агаар ямар байна вэ?

Tuesday, September 14, 2010

Санаж яв



Хананд өлгөсөн дипломуудын аль нь хүнийг жинхэнэ хүн болгох зүйл биш гэдгийг санаж яв.

Хайр гэдэг үг хэр их хэрэглэгдэнэ, утга агуулга нь төдий чинээ суларна гэдгийг санаж яв. Үйл хөдлөлөөрөө илэрхийл.

Ярилцаж буй хүнээ эвгүй байдалд оруулахгүй байх болон өөрийн үзэл бодлоо хамгаалах хоёрын хоорондох торгон зурвасыг олох маш хэцүү гэдгийг санаж яв.

Үнэнч найзууд болон үнэнч хайрын дундуур юу ч орж чадахгүй болохыг санаж яв.

Туршлага нь хэдэн оймс элээсэнтэй чинь биш, амьдралдаа юу амссантай чинь холбоотой болохыг санаж яв.

Гэр бүлийнхэн цаг ямагт чиний дэргэд байж чадахгүй. Хамаатан биш ч байсан бусад хүмүүсээс хайр, итгэл сурч болдгийг, гэр бүл заавал мах цусаар холбоотой байх албагүй гэдгийг санаж яв.

Хичнээн ойр дотно байсан ч хамгийн сайн найзууд нэг нэгнийгээ гомдоох үе байдгийг, иймээс тэднийг өршөөж сурах хэрэгтэйг санаж яв.

Заримдаа зөвхөн бусдыг уучлах нь хангалтгүй байж болох юм. Хүн өөрийгөө ч мөн уучлах хэрэгтэй гэдгийг санаж яв.

Зүрх сэтгэл чинь хичнээн их шаналан өвдөж байсан ч дэлхий бидний төлөө эргэлдсээр байгаа гэдгийг санаж яв.

Бидний хяналтаас гадуурх нөхцөл байдал амьдралд нөлөөлсөн байж болно. Гэвч хэн байх, ямаршуу явахаа бид өөрсдөө л шийддэг гэдгийг санаж яв.

Хоёр хүний маргалдах нь тэдний бие биедээ дургүй болохыг батлахгүй. Маргалдахгүй байх нь ч дуртай гэдгийг баталж чадахгүй болохыг санаж яв.

Бүхий л бэрхшээлүүд боломж агуулж байдаг бөгөөд уг бэрхшээл нь боломжийнхоо хажууд өчүүхэн зүйл болохыг санаж яв.

Хайрыг алдах амархан. Харин алдсаныхаа дараа харамсах хэцүү гэдгийг санаж яв. 


Сургамжит өгүүллэг 3-аас...
READ MORE - Санаж яв

Tuesday, September 7, 2010

Хана уу? Гүүр үү?



Маш удаан хугацааны турш хамт амьдарсан ах дүү хоёр байжээ. Нэгэн өдөр тэр хоёрын хооронд үл ойлголцох асуудал үүсч гэнэ. Ах дүү хоёрын дунд анх удаа ийм зүйл тохиолдож байгаа бөгөөд энэ явдал нь даамжирсаар ах дүүгийн харьцааг нь таслав. Тэд бие биедээ гомдоод зогсохгүй олон жил хамт хэрэглэсэн тариан талбай болон хөдөө аж ахуйн багаж хэрэгслээ ч салгацгаав.

Ялихгүй үйл ойлголцлоос болж хамаг зүйлээ салгаад зогсохгүй бие биедээ муу үг чулуудах болов. Тэдний хоорондын хүчтэй хэрүүл маргаан эцэстээ бие биеэсээ зугтсан чив чимээгүй амьдрал болон хувирлаа. Нэгэн өглөө ахынх нь гэрт нэгэн мужаан иржээ. Тэрээр гартаа том гэгч нь мужааны цүнх барьсан байлаа.

Гэрийн эзнээс ямар нэгэн хийлгэх ажил байгаа эсэхийг ийнхүү асуув:
-Их бага гэлгүй ямар нэгэн хийх ажил байвал танд тус болох гэсэн юм. Ямар ч ажил байсан хэдхэн өдрийн дотор хийж дуусгана гэхэд
-Тийм ээ, чамаар хийлгэх нэг ажил байна хэмээн дүүгийнхээ тариалан руу заан
-Тэр голын нөгөө талд манай хөршийнх байдаг юм. Өөрөөр хэлбэл, манай дүүгийн тариалангийн талбай байгаа. Өнгөрсөн долоо хоногийг хүртэл энэ талбай бид хоёрын дундых байсан юм. Харин тэр суваг татаж, хамтдаа эзэмшиж байсан газрын дундуур гол урсгасан гэв.

Ажил хайж ирсэн хүн түүний яриаг анхааралтай сонссоны дараа түүнээс ингэж асуув.
-Та надаар юу хийлгэмээр байна?
-Дүү маань намайг зовоохын тулд үүнийг хийсэн байх. Тиймээс би одоо түүний хийснээс илүү том зүйл хийх болно. Ах нь ингэж хэлээд мужааныг дагуулан малын хашаанд очоод тэнд байсан модыг харуулаад, тэр модоор хоёр тариалангийн хооронд гурван метр өндөр хана хийлгэхийг хүсэж байгаагаа хэлэв. Тэрээр мужаанд хандан
-Та хэдэн өдөр ч ажиллаж болно. Өөрөө мэдээд хий. Гол нь миний нүд дүүгийнхээ талбайг харахыг хүсэхгүй байна гэв. Мужаан толгойгоо дохин
-Таны байдлыг ойлголоо гэлээ.

Ах нь мужаанд хэрэгтэй бүх багаж хэрэгслийг өгөн ажиллах газрыг нь зааж өгсний дараа худалдаа хийхээр тосгон руу явжээ. Мужаан бүтэн өдрийн турш хэмжиж, огтолж, хадан ажлаа маш эрчимтэй хийв. Орой нар жаргах үед тэр ажлаа дуусгасан байлаа. Энэ үед ах нь худалдаагаа дуусгаад ирж байв. Тариалангийн талбайд ирэнгүүтээ ах нь мужааны хийсэн гүүрийг хараад нүд нь орой дээрээ гартал гайхжээ. Мужаан хананы оронд сувгийн нэг эргээс нөгөө эрэг хүртэл сунасан сүрлэг сайхан гүүр барьсан байв. Энэ нь яг л урлагийн бүтээл гэмээр үнэхээр сайхан гүүр байлаа. Ийнхүү гайхшран зогсож байтал өөдөөс нь нэг хүн өөрийг нь чиглэн ирж байв. Сайн хартал түүний хөрш буюу дүү нь байжээ. Дүү нь гараа алдлан гүүрний нөгөө талаас ирж байлаа. Дүү нь
-Миний танд үйлдсэн олон буруу зүйл болон хэлсэн муухай үгнүүдийн оронд энэ гүүрийг хийлгэснээр та өөрийгөө ямар ухаантай, ямар агуу хүн болохоо надад харууллаа. Та ч гэсэн гараа алдлан над дээр ирээч гэлээ.

Тэд гүүрний хоёр үзүүрээс бие бие рүүгээ гүйн гүүрний голд ирээд чангаар тэврэлдэв. Ах нь эргээд харахдаа цүнхэндээ юм хумаа цуглуулан хийчээд явахыг завдаж буй мужааныг харлаа. Тэгээд
-Та битгий яваач. Хүлээгээрэй. Танаар хийлгэх ажил дахиад байна гэхэд мужаан
-Би эндэх ажлаа бүгдийг нь хийчихлээ. Одоо би явах хэрэгтэй. Надад дахиад барих хэрэгтэй зөндөө гүүр байна гэжээ.

Хүмүүсийн харилцаанд үргэлж гүүр нь болж яваарай.


Сургамжит өгүүллэг 3-аас...
READ MORE - Хана уу? Гүүр үү?

Thursday, September 2, 2010

Саад


Эрт урьд цагт нэгэн хаан амьдардаг байжээ. Тэр хаан нэг өдөр ордон руу хүрдэг зам дээр хад тавиулаад өөрөө цонхоор харан юу болохыг хүлээж суужээ. 

Өглөөнөөс үд хүртэл тэр замаар хаант улсын хамгийн баян чинээлэг худалдаачид, аянчид, ордныхон гээд олон янзын хүмүүс өнгөрчээ. Тэд бүгд л замд тээглэсэн хадыг тойрон гарч байлаа. Ихэнх нь хааныг их л чанга дуугаар шүүмжилж байв. Ард олноосоо авсан татвараа засварт хэрэглэсэнгүй гэцгээж байлаа. 

Эцэст нь тосгоны нэг тариачин замаар ирж байв. Ордонд жимс ногоо авч ирж байжээ. Үүрч ирсэн сагсаа газар буулгаад зам дээр тээглэсэн хадыг түлхэж эхлэв. Ихэд ядарч, хөлс нь урсаж байсан ч эцэст нь хүнд хадыг замаас зайлуулж чаджээ. Тариачин эр сагсаа үүрээд босох гэтэл түүний замаас зайлуулсан хадны доор байсан бяцхан нүхэнд ууттай зүйл байхыг харав. Онгойлгож үзтэл дүүрэн алт байлаа. Мөн хажууд нь хааны бичсэн зурвас байв. Зурваст "Хадыг замаас зайлуулсан хүн энэхүү алтыг авна" гэж бичжээ.

Тариачин эр болсон явдлаас их зүйл сурчээ. "Саад болгон бидний амьдралыг сайжруулах боломж юм."


Сургамжит өгүүллэг 3-аас...
READ MORE - Саад

Saturday, August 28, 2010

Жинхэнэ хайр



Нэгэн мэргэн хүнээс ийнхүү асуужээ.
-Хайртай гэдгээ зөвхөн хэлдэг хүн, хайртай гэдгээ үйлдлээрээ харуулдаг хүмүүсийн хооронд ямар ялгаа байдаг вэ?"
-За би танд харуулъя
Эхлээд зөвхөн хайртай гэж хэлдэг хүмүүсийг дуудаж оруулан, сандал дээр суулгав. Бгүд суудлаа эзэлсэн байлаа. Удалгүй тэдэнд тавагтай халуун шөл өгөв. Мөн нэг метрийн урттай халбага өгчээ. Тэгээд "Шөлийг уухдаа зөвхөн халбагны ишний үзүүр хэсгээс барьж, халбагадаж уух ёстой" гэсэн нөхцөл тавив. Ингээд хүмүүс уух гэж оролдож эхэллээ. Гэтэл юу болсон гээч? Халбаганы иш нь урт учраас асган цутгасаар хэн нь шөлнөөс ууж чадсангүй. Ингээд бүгд бүтэлгүйтэж өрөөнөөс гарцгаав. Дараа нь хайрын үнэ цэнийг мэддэг хүмүүсийг дууджээ. Энэ удаа царайнд нь гэрэл тодорсон, нүд нь хайраар гэрэлтсэн хүмүүс орж ирлээ. Бүгд суусны дараа шөл уух нөхцөлийг тайлбарлаж өгөв. Харин тэд урт халбагаараа шөлийг хутгаж аваад эсрэг талдаа сууж байгаа хүнд өгч байлаа. Ийнхүү бүгд нэг нэгийгээ хооллож дуусаад, талархан гарчээ. Энэ үед мэргэн ухаантан "Хэн зөвхөн өөрийгөө бодож, өөрийгөө цатгахыг хүснэ, тэр хүн хоосон үлдэх болно. Харин хэн хажууд байгаа хүнээ бодож, түүнд өгнө, тэр хүн эргээд түүнээс авч, хэн нь гомдохгүй үлдэнэ. Үнэндээ авахаас илүү өгөх нь ерөөлтэй" гэж хэлэв.


Гэр бүл-Аз жаргал сэтгүүлээс...
READ MORE - Жинхэнэ хайр

Thursday, August 26, 2010

Гарын арван хууль




Нэг
Хүний мөрийг цохих бус
Илж урамшуулахад ашиглаарай.

Хоёр
Цохиж, шарх үлдээхэд бус
Эмчилж, эдгээхэд зориулаарай.

Гурав
Буруу зүйлд сунгалгүй
Халуун дотноор атгахад хэрэглээрэй.

Дөрөв
Мөрийтэй тоглоом эсвэл арга зальд бус
Бусдын төлөө үйлчлэхэд ашиглаарай.

Тав
Үргэлж авахын тулд бус
Харин хуваалцахын тулд зориулаарай.
Зургаа
Шүүмжлэн зангахад бус
Залбиран атгахад зориулаарай.

Долоо
Хөлсөө урстал тоглож наадахад бус
Хичээнгүй ажиллаж, хөдөлмөрлөхөд зориулаарай.

Найм
Бусниулж сарниулахад бус
Босгон байгуулахад ашиглаарай.

Ес
Автомат тоглоом, зурагтын товчлуур дарахад бус
Ариун ном уншин, эргүүлэхэд ашиглаарай.
Арав
Бурханы өгсөн гар учраас
Бурханы алдрын төлөө зориулаарай.


Гэр бүл-Аз жаргал сэтгүүлээс...
READ MORE - Гарын арван хууль

Saturday, August 21, 2010

Давчуу сэтгэл


Тосгоны нэгэн айлын гэрт найр болжээ.
Найр ид дундаа орох үеэр архи зөөж явсан нэгэн зарц
Гэнэт гар алдаж усан үзмийн дарс асгаад
Гэрийн хананд нэгэн толбо үлдээжээ.
Эзэн бухимдаж зочдоо аваад
Эндээс явж, бугын анд гарцгаая гэв.
Гэтэл нэгэн зочин явалгүй үлдэж
Гэнэ алдаж дарс асгасан зарцыг тайвшруулжээ.
Тэгээд бийр гаргаж ирэн толбо үлдсэн газар
Зураг зурж үлдээж гэнэ.
Гэтэл эзэн ангаас ирээд ихэд гайхав гэнэ.
Толбон дээр хөөрхөн цэцэг зуржээ.
Тэр зургаа "Хөөгдсөн буга" гэж нэрлэжээ.
Хүний амьдралд толбо заавал байдаг
Хүн бүр түүнийгээ бусдаас нууж амьдардаг
Харин хэн боловч агуу зураачтай учирвал
Хар толбо нь гайхамшигт бүтээл болж өөрчлөгдөх болно.


Гэр бүл-Аз жаргал сэтгүүлээс...
READ MORE - Давчуу сэтгэл

Friday, August 20, 2010

Албаар давхраа оруулж ирээд л...


Би сайхан хөлтэй хүүхэн биш. Үүнийг бүх хүн мэддэг. Тиймээс зарим сайхан хөлтэй эмэгтэйчүүдийг хараад бүдүүн булчинтай өөрийнхөө хөлийг толинд харахаар бүр их уур хүрдэг. Гэвч тахир дутуу, тэргэнцэртэй явдаг хүнтэй таарахдаа, өөрийнхөө цагаан манжин шиг бүдүүн хөлийг хараад баярлах сэтгэл төрдөг юм.
Сайхан хөлтэй хүүхнүүд шиг очих очихгүй газраар яваад байхгүй зүгээр ч юм шиг. Тийм биш гэж үү?

Би сайхан нүдтэй хүн биш. Нэг хэсэг давхраатай хөөрхөн нүд хараад, өөрийнхөө нүдэнд гараараа давхраа оруулж, "ийм байсан бол хөөрхөн байхгүй юу" гээд л ганцаараа ярьдаг байлаа. Гэвч хараагүй хүнтэй уулзаад, давхраагүй ч гэсэн юм хардаг нүдтэйдээ баярлах болсон. Тэд нарын хүсэж байгаа номыг уншиж, бичлэг тавьж, бас дуу хурааж байхдаа тэдний нүд нь болж өгөхдөө давхраа ямар хамаатай юм бэ гэж бодох болсон. 

Нүд хөлнөөс гадна дуу хоолой ч гэсэн адилхан. Гоё дуулдаг хүнийг хараад атаархдаг байсан. Эмнэлэгт ажилладаг байхад өвчин зовлондоо шаналсан өвчтөнүүдэд магтаалын дуу дуулж өгөхийг үнэхээр их хүсдэг байлаа. Гэвч солгой, бүдүүн хоолойгоор дуулбал бүр их зовоох юм шиг санагдаж, тэгэх болгондоо Бурханаас сайхан дуу хоолой өгөөч гэж чин сэтгэлээсээ гуйдаг байж билээ. Удаан хугацааны турш ямар ч хариулт авсангүй. Хоёр гурван хүний өмнө гарвал ичээд юу ч хийж чаддаггүй байлаа. Гэвч хэсэг хугацааны дараа хэлгүй хүмүүстэй уулзав. Хэдийгээр миний дуу хоолой галууных шиг баргил бүдүүн боловч чанга дуугаар магтаалын дуу дуулж чаддагтаа хичнээн их баярласан гээч. Хэлгүй хүн ярьж ч, сонсож ч чадахгүй шүү дээ. Муухай хоолойтой ч гэсэн тэдний чих, дуу хоолой болж тус болсондоо, тэдний зовлонгоос хуваалцсандаа хичнээн их баярласан гээч. Гоё сайхан хоолойтой болоод гэм нүгэл үйлдсэнээс өөрийгөө захирч, хэрэгтэй үед хэрэгтэй үг хэлж, дуу хоолойгоо залбиралд зориулахад хичнээн сайхан гээч. Хэлгүй, дүлий хүмүүстэй уулзсанаасаа хойш хоолойгоо голохоо больж, бүр эсрэгээр дохионы хэл сурч, тэдний хэл, чих нь болох болсон.

Би бүдүүн хөл, давхраагүй нүд, солгой хоолой, бас дээр нь бусдын хамгаалалт хэрэггүй эр хүнийх шиг бадриун хүчтэй гартайдаа баярлаж эхэлсэн. Хараагүй хүүхдүүд миний гарыг барингаа "Эгч ээ, та бүдүүн юм аа" гэхэд нь би "Үгүй" гэж зүтгэдэг. "Үгүй ээ, гар минь л бүдүүн байхгүй юу даа /үнэндээ бүх биеэрээ бүдүүн л дээ/ гэдэг. Гэсэн ч хүүхдүүд намайг бүдүүн гэж боддог.

Эр хүнийх шиг гараа харахаар уур хүрдэг боловч бүдүүн боловч эрүүл гар минь гэж бодох болсон. Олон цагаар дохионы орчуулга хийсэн ч ерөөсөө өвддөггүй, түүгээр ч зогсохгүй тархины харвалттай хүмүүсийг тэргэнцэрт суулгаад түрэхэд хэрэг болдог хүчирхэг гартай гэж боддог.

Гэрлэхийн өмнө өөртөө уур хүрээд хоолоо хасаж, бус ус уухгүй байж үзлээ. Гэвч миний сул талууд эсрэгээрээ хүчирхэг талууд минь байжээ. Би өөрийгөө тэгж үзэхгүй л бол хэн намайг муухай биетэй гэж бодох билээ дээ. Одоо би өөртөө итгэлтэй амьдарч байгаа. 

Үнэндээ тахир дутуу, тэр нь бүр хүндэрсэн тахир дутуу хүмүүс хичнээн баяр хөөртэй амьдардаг гээч. Тэд надад бүтээлийн зүй тогтлыг ойлгуулж өгсөн. Үнэндээ гадаад төрхөөсөө болоод бүхий л амьдралынхаа туршид өөрийгөө бусдаас доогуур үзэж амьдрах хэрэггүй биз дээ. Сайхан хүн гэж туранхай, сайхан хөлтэй, давхраатай алаг нүдтэй байхаас илүү дотоод сэтгэл нь сайхан хүнийг хэлдэг юм.


Гэр бүл-Аз жаргал сэтгүүлээс...
READ MORE - Албаар давхраа оруулж ирээд л...

4 8 12




Өдөрт 4 удаа тэврэлдэх нь амьдрах хүчийг бий болгож,
Өдөрт 8 удаа тэврэлдэх нь аз жаргалаа хадгалах хүч болж
Өдөрт 12 удаа тэврэлдэх нь бие биедээ өсөж хөгжихөд нь тус болно.

Нэг удаа
Хоёр удаа
Гурван удаа
Цээж цээжээрээ нийлэхэд сонсогдох чиний халуун зүрхний цохилтонд
Дотроо хадгалсан өнгөрсөн өдрүүдийн зовлон шаналал,
Аман дотор эргэлдэж, гадагш гараагүй үлдсэн үгнүүд хайлан урсах мэт болно.

Аз жаргал гэдэг
Их юмтай хүн бага юмтай нэгэнд туслах биш.
Эргээ даган урсах голын ус мэт
Энгэртээ байгаа халуун сэтгэлийг хуваалцах үед
Аз жаргал бялхан урсана.

Мартаж орхисон тэр л халуун дулаанаар
Яг одоо энэ мөчид
Таныг би тэврэхийг хүснэ.


Гэр бүл-Аз жаргал сэтгүүлээс...
READ MORE - 4 8 12

Хайранд хадгалах хугацаа байхгүй


"Та ямар талх хайж байна вэ?"
Дэлгүүрт орж ирээд 20 минут орчим болсон хэрнээ бараануудыг нэг нэгээр нь авч үзэн, буцааж тавьж байгаа нэгэн залууг дэлгүүрийн эзэн тэвчиж тэвчиж байгаад асууж орхисон нь энэ байв. Тэгтэл нөгөө залуу
"Хадгалах хугацааг нь харсан юм. Хадгалах хугацаа нь дууссан талх зарж байна уу л гээд..."
"Хадгалах хугацаа нь өнөөдөр дуусах хэдэн талх байгаа тул санаа зоволтгүй идэж болно оо."
"Аан тийм үү?"
Ямар ч учир шалтгаангүй юм ярьж байгаа залууг сайтар харвал бохир заваан харагдав. Түүнээс муухай үнэр ханхалж байсан боловч дэлгүүрийн эзэн түүнийг хөөсөнгүй.
Цагийн зүү шөнийн 12 цагийг заахад нөгөө залуу нэг талх аван лангуун дээр тавилаа. Тэгээд цагийн зүү 12-ын тоог өнгөрөнгүүт тэр үеийг хүлээж байсан мэт талхаа аван касс руу дөхөж очсоноо гэнэт гадагш гүйн зугтав. 
Тэрээр гүйж гарахдаа шурган унав. Гэнэт түүний мөрөн дээр нэг хүн гараа тавилаа. Эргээд хартал дэлгүүрийн эзэн зогсож байв. Айж сандарсан залуу авсан талхаа гаргаж өгөн
"Уучлаарай. Хэдэн өдөр юу ч идээгүй болохоор хулгайлсан юм. Шөнийн 12 цаг өнгөрчихсөн юм чинь энэ талхны хугацаа нь дуусчихсан биз дээ?" гэж хэллээ.
Харин дэлгүүрийн эзэн халааснаасаа нэг ууттай сүү гаргаж өгөөд ингэж хэлжээ.
"Залуу минь, хайранд хадгалах хугацаа гэж байдаггүй юм. Үүнийг бас уугаарай."


Гэр бүл-Аз жаргал сэтгүүлээс...
READ MORE - Хайранд хадгалах хугацаа байхгүй

Monday, August 9, 2010

Та миний хавар

Би хоёр ээжтэй. Намайг төрүүлээд нэг сарын дараа энэ дэлхийг орхин одсон жинхэнэ ээж, намайг өсгөсөн хойд ээж. Жаахан байхдаа хойд ээжийгээ төрсөн ээжийгээ гэж бодон тэврүүлж, эрхэлдэг байлаа. Дараа нь үнэнийг мэдээд аз жаргалтай байсан амьдрал маань бага багаар хэцүү болж эхэллээ.
Нэгэн өдөр ээжийн бэлдэж өгсөн хоолыг нээтэл дотор нь нэг захиа байв. Уур хүрээд захиаг нь уншилгүй цүнхэндээ хийж орхилоо. Хойд ээжийг надад сайн хандах бүрт миний уур хүрч байв. Цэцэг дэлгэрсэн нэгэн хаврын өдөр хойд ээж тосгоны хэдэн эгч нартай нэг хоногоор зугаалахаар явлаа. Гэрийнхэнтэйгээ оройн хоолоо идэж байтал утас дуугарлаа. Утсаар ярьж байсан аавын царай барайж орхив. Ээж автомашины ослоор нас барсан байлаа. Ээжийг мөн эсэхийг шалгаж үзсэний дараа ээжийгээ тэнгэрийн улс руу үдэв.
Оршуулгын ажил дууссаны дараа гэртээ ирээд ус алдсан 00-ын өрөөний усыг хаангаа би ч гэсэн хаагдаж байгаа ус адил нулимсаа гаргахгүйг хичээж байлаа. Ээжийн хоосон орон зай... Гэнэт захидал санаанд орж, цүнхнээсээ гарган уншив.

"Хайрт хүү минь, дараа эсвэл нэзээ нэгэн цагт чиний сэтгэлд миний орох орон зай гарвал өмнөх шигээ чанга дуугаар "ээж ээ" гэж дуудаж чадах уу? Тэр хүртэл ээж нь хүлээнэ. Сэтгэлээ өвтгөж, шаналахгүйгээр бие биеэ хайрлавал сайнсан."

Ээжийг минь авч одсон тэр хаврыг би ийнхүү зүйрлэлээ. Хаврын нэгэн дулаахан өдөр та миний сэтгэлийн гүнд орж ирсэн билээ.


Гэр бүл-Аз жаргал сэтгүүлээс...
READ MORE - Та миний хавар

Сэтгэлийн цэцэрлэгээ арчилдаг хүн

Шоронд орж ирээд удаагүй нэгэн хоригдол байжээ. Тэндээс хэзээ гарахаа ч мэдэхгүй, тийм жижигхэн өрөөнд юу хийхээ ч мэдэхгүй байсан тэрээр харгалзагчдаа нэгэн хүсэлт тавив. 
"Ямар ч асуудал гаргахгүй тул шоронгийн хашаанд нэг жижигхэн цэцэрлэг хийхийг зөвшөөрөөч."
Ажилд ороод удаагүй байсан харгалзагч түүнийг нь зөвшөөрчээ. 
Тэгээд тэр эхлээд арчилгаа багатай боловч сайн ургадаг чинжүү, сонгино тарьжээ. Үр тариад ургаж байгааг нь харан сэтгэл хангалуун байдлыг олж авдаг байв. Тэгээд дараа жил нь янз бүрийн сарнай цэцэг тарьж, бас жижиг бут модны үр хүртэл суулгалаа. Түүнээс хойш хоёр жилийн турш цэцэрлэгээ сайтар арчилж гэнэ. Тэгээд нэг зүйлийг ухаарсан байна.

"Ингэж үр тарьсныхаа дараа түүнийг ажиглан харж, үр дүнг нь хардаг цэцэрлэгчийн ажил эгэл жирийн боловч маш их урам зориг, баяр баясгалан өгдөг. Тийм ээ, хэдийгээр би одоо эрх чөлөөгүй боловч энэ цэцэрлэгийг арчилж байгаатай адил өөрийгөө ч гэсэн арчлах хэрэгтэй юм байна."

Шоронгийн хашаан дахь жижигхэн цэцэрлэгт янз бүрийн зүйл тарьдаг байсан тэрээр 17 жилийн дараа тэндээс суллагджээ. Тэгээд 1993 онд Нобелийн шагнал хүртсэн байна. Тэр бол Өмнөд Африкийн анхны хар арьст ерөнхийлөгч Нелсин Мандилла юм.


Сургамжит өгүүллэг 3-аас...
READ MORE - Сэтгэлийн цэцэрлэгээ арчилдаг хүн

Wednesday, August 4, 2010

Аль хэдийн төлчихсөн


Анагаахын нэгэн ядуу оюутан хэдэн ном тэвэрсээр хуучин номын дэлгүүр лүү гүйн одлоо. Хэдийгээр хайртай номнууд нь байсан боловч зарахгүй л бол хоосон хонохоос өөр аргагүй байсан учир яах ч арга байсангүй. Гэвч хуучин номыг нь худалдан авдаг байсан номын дэлгүүрийн эзэн үүдээ хаасан байлаа.

Маш их өлсөж, цангаж байсан тэрээр ямар ч хамаагүй айлд орж, өлссөн гэдсээ дүүргэе гэж бодов. Ийнхүү шийдээд нэгэн айлд ортол өөрөөс нь дутахгүй ядуу айл байлаа. Нэгэн бяцхан охин гэрээ хараад үлдсэн байв. Зүгээр буцаад явах уу хэмээн эргэлзэж байснаа ямар ч хамаагүй идэх юм байвал өгөөч гэж гуйжээ. Бяцхан охин гал зуухны өрөөнөөсөө нэг шилтэй сүү авчирч тэр оюутанд өгөөд,
-Манай ээж ажилдаа явахдаа намайг уугаарай гэж үлдээсэн юм. Жаахан боловч танд өгье" гэлээ.
Анагаахын оюутан сүүг авах тэрхэн мөчид бяцхан охины халуун сэтгэлийг мэдрэв. Тэр үнэхээр сайхан сэтгэлтэй охин байлаа.
"Баярлалаа. Нэрээ гэрийнхээ хаягтай бичээд өгч чадах уу?" гэж нөгөө оюутан хэлэв.
Үүнээс хойш хэдэн жил өнгөрчээ.

Нэгэн эмэгтэй хүнд өвчнөөр өвдөж, эмнэлэгт хэвтэн, хагалгаа хийлгээд гарах болжээ. Түүний охин ээжийгээ эдгэрсэнд үгээр хэлэхийн аргагүй баярлаж байсан боловч асар их үнэтэй эмчилгээний төлбөрөөс болж сэтгэл нь үнэхээр зовж байв. Тэгээд эмчилгээний төлбөрийн хуудсыг автал дээр нь ингэж бичсэн байжээ.
"Эмнэлгийн ор, хоолны төлбөр ба хагалгааны үнийг нэг шил сүүгээр төлсөн."
READ MORE - Аль хэдийн төлчихсөн