Monday, May 31, 2010

Уруул аяга хоёрын хооронд маш хол зай байдаг

Эрт дээр үед нэгэн нэртэй харгис хаан байжээ. Шинэхэн тариалангийн талбайд усан үзмийн суулгац суулгуулж байжээ. Энэхүү ажлаа хурдан дуусгахын тулд боолуудаа ерөөсөө амруулахгүйгээр ажиллуулж байв. Тэгтэл хөөрхий боолуудын нэг нь ядарч туйлдсандаа шургаж унаад тэсэлгүй харгис хаандаа:
-Эрхэм дээдэс ээ, яагаад ингэж их яаруулаад байгаа юм бэ? Та энэ талбайд суулгасан усан үзмээр хийсэн дарсыг ууж чадахгүй шүү дээ гэж хэлэв. Энэ үед хааны уур хүрч байсан боловч нэг ч үг дуугарсангүй. Дараа нь усан үзмээ хураасныхаа дараа бүх боолуудаа цугларахыг тушаав. Тэгээд тэр тариаландаа ургуулсан усан үзмээр хийсэн дарснаас нэг аягыг хийж авчрахыг тушааж гэнэ. Өмнө нь хаанд дарс ууж чадахгүй гэж хэлж байсан боол ч гэсэн ирсэн байлаа. Хаан аягатай дарсаа бариад
-Алив, одоо надад энэ дарсыг хэзээ ч уухгүй гэдгийг дахиж хэлж чадах уу? гэж асуужээ. Гэтэл өнөөх боол ингэж хариулав.
-Тодорхойгүй шүү дээ, эрхэм дээдэс ээ. Танд ууж чадна гэж хэлж чадахгүй нь. Учир нь уруул аяга хоёрын хооронд маш хол зай байдаг. Энэ хооронд танд юу тохиолдохыг би мэдэхгүй гэжээ.
Боолыг үгээ дөнгөж дуусгаад байж байтал хааны шадар цэргүүдийн нэг орж ирэв. Нэг зэрлэг бодон гахай усан үзмийн талбайд хашааг нь эвдээд орж ирсэн тухай хэлж гэнэ. Хаан гартаа барьсан дарсаа ууж амжилгүй гарч, зэрлэг гахайн орсон талбай руу гүйжээ.
Хаан бодон хоёрын хооронд амь тэмцсэн тулаан эхлэв. Сүүлд нь зэрлэг бодон гахай жад шиг иртэй шүдээрээ хааны гэдсийг хүү татаж, хаан үхэв. Харин аягатай дарс нь ширээн дээр хоцорчээ.
Нэг хормын дараа бидэнд юу тохиолдохыг тааж мэдэхэд хэцүү учир одоо байгаа агшнаа зөв ашиглах хэрэгтэй.
READ MORE - Уруул аяга хоёрын хооронд маш хол зай байдаг

Өөрчлөлт


Залуу зандан үеийн мөрөөдөл маань хязгааргүй байхад,
Дэлхийг өөрчлөхийг хүсдэг байлаа.
Хөгширч ухаажсан хойноо
Дэлхий өөрчлөгдөхгүйг ойлгосон юм.
Тэгээд мөрөөдлөө багасгаж,
Зөвхөн эх нутгаа өөрчлөхөөр шийдлээ.
Гэвч тэр ч бас өөрчлөгдөх шинжгүй байлаа.
Улам хөгширсөн үедээ
Хамаг хүчээрээ зөвхөн гэр бүл болон
Дотны хүмүүсээ өөрчлөх гэж үзлээ.
Гэвч бас л болсонгүй.
Одоо үхэх гээд хэвтэж байхдаа
Гэнэт ухаарлаа.
Эхлээд би өөрийгөө өөрчлөх хэрэгтэй байж,
Гэр бүлдээ үлгэр жишээ болж тэднийг өөрчлөх байсан юм.
Тэднээс авах урам, хүч зоригоор
Эх нутгаа илүү сайн болгож чадах байсан юм.
Тэгээд яаж мэдэхэв дэлхийг өөрчлөх байсан ч юм билүү.
READ MORE - Өөрчлөлт

Sunday, May 30, 2010

Хүнд ба хөнгөн


Амьдралд хүнд, хөнгөн ажлууд их байдаг
Энэ бүгдийг ялгаж салгах хэцүү.

Ярих хэлэх амархан,
Товч бөгөөд тодорхой ярьж, дуугаа хорих хэцүү.

Ухаан заах, эсвэл мунхруулах амархан,
Харин засаж, өөдлүүлэх хэцүү.

Төлөвлөх, эхлэх амархан,
Гэвч дуусгах хэцүү.

Авах амархан,
Өгөх хэцүү.

Өөрийгөө буюу хувиа бодох амархан,
Бусдыг бодож, бусдын төлөө явах хэцүү.

Сонирхох, үзэх амархан,
Харсан бус, мэдсэн хүн болох хэцүү.

Хөрөнгө мөнгөтэй болж, баяжих амархан,
Ариун сэтгэлтэй, үнэнч шударга баян хүн болох хэцүү.

Ядууг хуурч, хөөргөх амархан,
Өлсгөлөнг цатгалан болгох хэцүү.

Тангараглах, амлах амархан,
Хэлсэн үгэндээ эзэн болох хэцүү.

Сонгогдох, дэвших, удирдагч болох амархан,
Сайн мууг ялгаж, шударга байх хэцүү.

Булхай, худал, нүд хуурах, мэхлэх амархан,
Чин сэтгэлээсээ үнэнч байх хэцүү.

Цус урсгах, шархлуулах амархан,
Сэдэрсэн шархыг аниулах хэцүү.

Биеийн амрыг харах, шунах амархан,
Биеэ зовоож, шуналаа хязгаарлах хэцүү.

Гэрлэж, айл гэр болох амархан,
Амар амгалан гэр бүл болох хэцүү.

Төрөх, амьдрах амархан,
Хүн шиг хүн болох, хүн шиг үхэх хэцүү.

READ MORE - Хүнд ба хөнгөн

Уучлахгүй байхын дарамт

Нэгэн лицей сургуулийн багш сурагчиддаа нэг санал тавив:
-Та нар амьдралын туршлагатай болохыг хүсэж байна уу? Сурагчид хайртай багшийнхаа энэ саналыг ямар ч эсэргүүцэлгүйгээр хүлээн авлаа. Багш:
-Тэгвэл та нар миний хэлснээр хийнэ гэж амла гэхэд хүүхдүүд ч "За" гэв. Багш:
-Тэгвэл маргааш хүн бүр нэг нэг уут бас 5кг төмс авчраарай гэлээ.

Сурагчид даалгаврын учрыг нэг их ойлгосонгүй. Гэхдээ маргааш нь хүүхэд тус бүрийн ширээн дээр уут болон төмс бэлэн болсон байв. Өөрийг нь гайхсан харцаар ширтэх сурагчиддаа багш:
-За одоо та нар өнөөдрийг хүртэл уучлахыг хүсээгүй хүний тоогоор төмс сонго. Тэгээд тэр хүнийхээ нэрийг төмсөн дээрээ сийлээд уут руугаа хий гэж хэлэв.
Зарим хүүхдүүд уутандаа хоёр гурвыг хийсэн байхад зарим нь уутаа дүүргэсэн байлаа.
Багш өөр лүү нь "Одоо тэгээд яах юм бэ?" гэсэн харж буй сурагчиддаа хоёрдахь тайлбараа хэлэхдээ:
-Одоо та нар нэг долоо хоногийн хугацаанд хаашаа ч явсан энэ ууттай төмсөө хажуудаа авч яваарай. Унтахдаа ч, автобусанд, ангидаа гээд байнга авч явах хэрэгтэй.

Нэг долоо хоног өнгөрлөө. Багшийг ангидаа ормогц сурагчид бөөн гомдол хэлэв.
-Багш аа, энэ хүнд ачааг байнга хажуудаа авч явах үнэхээр хэцүү юм байна.
-Багш аа, төмснүүд ялзарч эхэлсэн. Хүмүүс ч бидэн рүү сонин соних хараад байна.
-Бид маш их ядарч, бас залхаж байна...
Багш инээмсэглэн сурагчиддаа ингэж хэлэв.
-Харж байгаа биз дээ, уучлахгүй байна гэдэг бид өөрсдийгөө л шийтгэж байгаа хэрэг юм шүү дээ. Бид сэтгэлдээ хүнд ачаа үүрч, өөрсдийгөө яллаж байдаг. Уучлахыг нөгөө хүндээ сайн юм хийж байна гэж боддог. Харин уучлах нь хамгийн эхлээд өөртөө хийж буй сайн үйлс юм гэжээ.
READ MORE - Уучлахгүй байхын дарамт

Friday, May 14, 2010

...


Суудал тавиагүй хүүд бүү уурла эмээ минь
Магадгүй та залуу харагдсан байх, харин ч баярлаарай.
Хөл дээр чинь гишгэсэн залууд бүү уурла бүсгүй минь
Магадгүй та таалагдаад өдсөн байх, харин ч та баярлаарай.
Гэрийн ажилдаа туслаагүй охиндоо бүү уурла ээж ээ
Магадгүй бусдын ажилд туслаад завгүй байсан байх, харин ч та баярлаарай.
Ээж аавынхаа зэмлэлд бүү уурла дүү нар минь
Магадгүй тэд чам шиг залуу явснаа мартсан байх, ойлгоорой.
Мөнгө зээлүүлээгүй найздаа бүү уурла анд минь
Итгэлээ зээлдүүлж болдоггүй гэдгийг ухааруулж өгсөнд нь баярлаарай.
Чамайг тоогоогүй бүсгүйд бүү уурла залуу минь
Өөрөөс нь илүү бүсгүйтэй учрах боломж өгсөн түүнд баярлаарай.
Оройтож ирсэн хүүдээ бүү уурла аав аа
Магадгүй унааны мөнгөөрөө айлын охинд бэлэг авч өгчихөөд алхаж ирсэн байх.


READ MORE - ...

Thursday, May 13, 2010

Хулгайчийн хөрөг

Залуу Унгар зураач Арпад Себеси тэрбумтан Элмер Келений хөргийг зурахаар болжээ. Зураачийн хувьд энэ нь маш хүнд ажил байлаа. Учир нь тэрбумтан тун харамч эр бөгөөд ердөө л гуравхан янзаар зогсож үзүүлээд, дахиж дүрээ харуулахгүй гэжээ. Ингээд залуу зураач нүдээрээ тогтоохыг хичээн асар их хүч хөдөлмөр гарган зурав. Зураач ийм хүнд нөхцөлд зурсан гэхэд дажгүй зурсандаа баярлан тэрбумтанд зургийг нь үзүүлтэл өөртэй нь адил болоогүй тул харамч эр худалдаж авахаас татгалзжээ. Зураач залуу яах аргаа олохгүй хэсэг тээнэгэлзсэнээ, "Тэгвэл та цаасан дээр 'Энэ хөрөг зураг өөртэй чинь адил болоогүй тул авахаас татгалзав' гэж бичээд гарын үсгээ зурж өгнө үү" гэж хүсэв. Харамч тэрбумтан ч ийм амархан салсандаа баярлан хүссэн бичгийг нь хийж өгчихөөд яваад өгөв. 
Энэ явдлаас хойш хэдэн сарын дараа Унгарын урлагийн нийгэмлэг Будапешт хотын уран зургийн галлерейд үзэсгэлэн гаргажээ. Энэ үзэсгэлэн болсноос хойш хүмүүс шуугиж гарав. Тэрбумтны утас нь зогсоо зайгүй хангинаж эхлэв. Харамч эр галлерейд очоод хартал өөрийнх нь хөргийг "Хулгайчийн хөрөг" гэж нэрлээд өлгөсөн байжээ. Тэрбумтан уурлаж, зургийг даруй буулгахыг шаардахад галлерейн захирал зөвшөөрсөнгүй. Тэрбумтан маш их уурлаж, намайг гүтгэн доромжилж, нэр хүндэд минь халдсан учир шүүхэд өгнө гэж сүрдүүлэв. Үүнийг сонссон галлерейн захирал "Та өөрөө энэ хөргийг өөртэй чинь адил болоогүй хэмээн мөнгө өгөхөөс татгалзаж, зураачид нь ийм бичиг өгсөн шүү дээ" гэж хэлэхэд тэрбумтан тэр хөргийг авахаас өөр аргагүй байдалд хүрэв. Гэхдээ тэр хөрөг анхны үнээсээ 10 дахин өндөр үнээр зарагдаж байсан тул ийнхүү хуншгүй авирлаж, хүний хөдөлмөрийг үгүйсгэснийхээ хариуг 10 дахин их үнээр төлсөн байна. Бүх зүйл хариутай байдгийг санаж явах хэрэгтэй.
READ MORE - Хулгайчийн хөрөг

Tuesday, May 11, 2010

Гадаад үзэмжинд хууртагдах

Нэгэн өдөр САЙХАН, МУУХАЙ хоёр голын эрэг дээр тааралджээ. Тэгээд голд сэлэхээр болж, хувцсаа тайлан голд орцгоов.
Хэсэг хугацаа өнгөрсний дараа МУУХАЙ голын эрэг дээр гарч ирэн САЙХАНы хувцсыг өмсөөд явчихжээ. САЙХАН уснаас гарч ирээд хувцсаа хайгаад олсонгүй. Тэгээд шалдан байхаас ичээд аргагүйн эрхэнд МУУХАЙн хувцсыг өмсөөд явав.
Энэ бол өнөөгийн бодит байдал юм. Хүмүүсийг энэ хоёрыг ялгаж салгаж чаддаггүй. Бид дотоод байдлыг нь харахаас илүү гадаад байдлыг нь эхэлж хардаггүй гэж үү? Гэхдээ МУУХАЙГ нь таньж чаддаг хүмүүс цөөнгүй бий. Хэдийгээр САЙХАН гаднаа муухай харагдсан ч түүний нүднээс сайхныг олж харж болно.
READ MORE - Гадаад үзэмжинд хууртагдах

Зорилго

Нэгэн сургуулийн хүүхдүүд хичээлийн завсарлагаанаар өнгөрсөн шөнө орсон цасаар тоглож байлаа. Сургуулийн хашаа цав цагаан зузаан цасаар хучигдсан байсан нь хүүхдүүдийн хувьд ёстой л нэг жаргалын орон мэт байсан ба тэд ухаанаа алдан тоглож байв. Багш нь тэдэнд хандан:

-Хүүхдүүд ээ, нэг тоглоом тоглоцгооё. Хашааны нэг талаас нөгөө тал хүртэл цасан дээр огт муруйлгүй, жижиг жижгээр алхаж хүрсэн хүүхэд түрүүлэх болно. Түрүүлсэн хүүхэд шагналтай шүү гэлээ.

Хүүхдүүд ч хазайлгүйгээр нөгөө талд хүрэхийг дор бүрнээ хичээн алхаж эхлэв. Бүгд дууссаны дараа багш хана түшүүлэн тавьсан шатан дээр гаран шалгатал нэг хүүхдээс бусад нь ямар нэгэн байдлаар хазайсан байлаа. Харин тэр хүүхдийнх ямар ч өөгүй тэгш байсанд багш маш их гайхаж, тэр хүүхдээс яаж ингэж явж чадсаныг нь асуухад хүү:

-Алимны модыг чиглээд л яваад байсан юм аа гэв.

Багш сайн ойлгоогүй тул дахин лавлаж асуухад хүү:

-Багш аа, би хөл рүүгээ биш, харин хашааны нөгөө талд байгаа алимны модноос нүдээ огт салгаагүй юм. Замд байгаа өөр юунд ч анхаарлаа хандуулахгүй зөвхөн хүрэх цэг рүүгээ хараад л яваад байсан чинь ингэж тэгш алхаж чадлаа гэж хариулав.

Багш энэ хүүгээс маш том зүйл сурч авчээ. Хүн зөвхөн зорилго руугаа чиглэсэн тохиолдолд л түүндээ хүрч чадна, эс тэгвээс өөр зүйлст тээглэн хазайх болно.
READ MORE - Зорилго

Monday, May 10, 2010

Их зүйл багаас эхэлнэ

Нэг өглөө зохиолч номын сэдвээ бодсоор далайн хөвөөгөөр алхаж явлаа. Гэнэт тэр далай руу ямар нэгэн зүйл шидэж байгаа хүнтэй тааралджээ. Нөгөө хүн рүү дөхөж очтол тэрээр эрэг дээр шидэгдэн гарч ирсэн далайн одуудыг далай руу буцаан шидэж байв. Зохиолч:
-Та тэднийг яагаад далай руу эргүүлж хаяж байгаа юм бэ? гэхэд
-Удахгүй нар мандана. Усны давалгаа татарч одууд хатаж үхнэ шүү дээ гэж хариулав. Зохиолч:
-Эрэг маш урт, энд олон мянган далайн одууд байна. Та бүгдийг нь далай руу шидэж амжихгүй шүү дээ. Шидсэн шидээгүй ялгаагүй юм биш үү гэхэд нөгөө хүн одуудаас нэгийг авч шидэнгээ:
-Та хар л даа. Түүний хувьд их зүйл өөрчлөгдөж байгаа биз дээ гээд дахин нэг одыг далай руу шидлээ.
READ MORE - Их зүйл багаас эхэлнэ

Friday, May 7, 2010

Үхэхийн тулд амьдардаг гэж үү?

Гүн ухааны нэгэн багш амьдралын тухай лекц уншаад удаагүй байтал нэгэн оюутан ангид санд мэнд гүйн орж иржээ.
Багш: Юунд тэгтлээ яаран гүйж орж ирээв?
Оюутан: Аа, сайн оноо авахын тулд л...
Багш: Сайн оноо аваад яах гэж?
Оюутан: Сургуулиа онц дүнтэй төгсөнө шүү дээ.
Багш: Онц дүнтэй төгсөөд яах юм бэ?
Оюутан: Сайн компанид ажилд оръё.
Багш: Сайн компанид ороод яах вэ?
Оюутан: Сайн хүнтэй хуримаа хийнэ.
Багш: Хурим хийгээд яах гэж?
Оюутан: Хүүхэдтэй болоод аз жаргалтай амьдарна.
Багш: Тэгээд яах гэж?
Оюутан: Хөгшрөөд өвөө болно шүү дээ.
Багш: Тэгээд?
Оюутан: ... Эцэст нь тэгээд үхэх л байлгүй дээ.
Багш: Тэгвэл хоорондох үйл явцыг нь хасаад үзвэл чиний гүйж орсон чинь эцсийн эцэст үхэхийн тулд юм шив дээ. Тэгж хэлж болно биз дээ?
READ MORE - Үхэхийн тулд амьдардаг гэж үү?

Айдас


Хүмүүсийн ихэнх нь алдахаас айдаг учраас хайрлахаас айдаг.
Өөрийгөө хайрлуулах хүн гэж үздэггүй учраас хайрлуулахаас айдаг.
Үүрэг хариуцлага авчирдаг учраас бодохоос айдаг.
Шүүмжлүүлэхээс айдаг учраас ярихаас айдаг.
Няцаагдахаас айдаг учраас сэтгэлээ нээхээс айдаг.
Залуу насны сайхныг мэдэрдэггүй учраас хөгшрөхөөс айдаг.
Дэлхийд сайхан зүйл үлдээгээгүй учраас мартагдахаас айдаг.
Амьдарч сураагүй учраас үхэхээс айдаг.
Өөрийнхөө төлөө биш, бусдын төлөө амьдардаг учраас
Хүмүүсийн ихэнх нь амьдрахаас айдаг.
READ MORE - Айдас

Амьдрал


Амьдрал бол алтан боломж, үнэ цэнийг нь ойлго.
Амьдрал бол маш сайхан, харж чаддаг бай.
Амьдрал бол аз жаргал, мэдэрч сур.
Амьдрал бол мөрөөдөл, биелүүлж сур.
Амьдрал бол дайн, тэмцэж сур.
Амьдрал бол үүрэг, гүйцэтгэж сур.
Амьдрал бол өв хөрөнгө, хамгаалж сур.
Амьдрал бол баяр, баясаж сур.
Амьдрал бол оньсого, тааж сур.
Амьдрал бол амлалт, биелүүлж сур.
Амьдрал бол уйтгар гуниг, дуугүй байж сур.
Амьдрал бол дуу, дуулж сур.
Амьдрал бол тэмцэл, тэвчиж сур.
Амьдрал бол аз, ашиглаж сур.
Амьдрал бол дурлал, хайртаа ол.
READ MORE - Амьдрал

Тэд хожсон, гэхдээ яаж?

Хэдэн жилийн өмнө Сеатлын тусгай Олимпт тахир дутуу есөн тамирчин 100 метрийн гүйлтийн уралдаанд оролцохоор гараан дээр бэлэн болсон байв. Гарах дохио өгөхөд бүгд урагшаа зүтгэлээ. Магадгүй бүгд тэр дороо хөдлөөгүй байж болох юм. Гэхдээ ихэнх нь түрүүлэх хүсэлтэй байлаа.

Гараанаас холгүй нэгэн залуу бүдэрч унаад уйлж эхлэв. Нөгөө найман уралдагч түүний уйлахыг сонсоод яарахаа больж, хойшоо харцгаалаа. Бүгд түүний хажууд буцаж ирцгээв. Тэдний дундаас Даун Сендромын өвчтэй охин уйлж байгаа залууг үнсээд "Энэ нь түүнийг зоригжуулах болно" гэж хэллээ.

Дараа нь бүгд бие биеэ сугадан бариа хүртэл хамтдаа алхлаа. Стадионд байсан бүх хүн босч, удтал алга нижигнүүлэн ташицгаав.

Та ер нь хэн нэгэнд туслахаар замаа өөрчилж байсан уу? Алхаагаа удаашруулан хэн нэгнийг сугадаж байв уу?

Тэнд байсан хүмүүс одоо ч гэсэн энэ түүхийг дурсан ярьцгаадаг. Учир нь бидэнд түрүүлэхээс илүү чухал зүйл бий. Удах эсвэл чиглэлээ өөрчилсөн ч гэлээ хамгийн гол нь бусдыг түрүүлэхэд нь бас туслах хэрэгтэйг мартаж болохгүй.
READ MORE - Тэд хожсон, гэхдээ яаж?

Хамгийн сайн нь

Уулын оройд гацуур болж чадахгүй бол
Хөндийд нэг бургас бол, гэхдээ
Голын хөндийн хамгийн том бургас нь чи байх ёстой.
Мод болж чадахгүй бол бургас бол
Бургас болж чадахгүй бол өвс бол
Ямар нэгэн байдлаар бусдад баяр баясгалан өг.

Сайхан үнэртэй цэцэг болж чадахгүй бол зэгс бол, гэхдээ
Нууран дундах хамгийн сайхан зэгс нь чи байх ёстой.

Бүгд ахмад болж болохгүй учир
Бидний ихэнх нь далайчин болох болно.
Энд хүн бүрт нэг юм бий.
Энэ бол том жижиг ажлууд
Хийх ажил маань бидэнд хамгийн ойр дөхөм санагдсан нь юм.

Зам болж чадахгүй бол жим бол
Нар болж чадахгүй бол од бол
Хожих юм уу хожигдоход
Их бага нь хамаагүй
Чи юу болж чадаж байна
Түүний хамгийн сайн нь болох ёстой.

READ MORE - Хамгийн сайн нь

Thursday, May 6, 2010

Цуурай

Нэгэн хүү аавтайгаа хамт ууланд аялжээ. Гэтэл хүү гэнэт хальтирч унаад өвдсөндөө болон "Ёо ёо" гэж орилжээ. Гэтэл дуу нь цуурайтан эргэн сонсогдов. Хүү хэн нэгэн бас "Ёо ёо" гэж орилохыг сонсоод, өмнө нь ийм зүйлтэй огт таарч байгаагүй тул гайхан
"Чи хэн бэ?" гэж хашхирав.
Хариу ч тэр дороо ирлээ.
"Чи хэн бэ?"
Хүү бухимдан
"Хулчгар!" гэв.
Хариу бас л ижилхэн:
"Хулчгар" гэж ирэв.
Хүү аавдаа:
"Аав аа, энэ юу болоод байгаа юм бэ? Би ойлгохгүй байна" гэв. Аав нь:
"Миний хүү сонсож бай гээд
"Бүх юм сайхан" гэж хашхирав.
Уулнаас ирэх дуу эргээд
"Бүх юм сайхан" гэв.
Аав нь
"Би чамд хайртай" гэхэд уулнаас ирэх дуу
"Би чамд хайртай" гэлээ.
Хүү сайн ойлгохгүй гайхсан хэвээр байлаа. Аав нь үүнийг хараад "Үүнийг цуурай гэдэг юм. Үнэндээ амьдрал цуурайтай адил. Чиний хэлсэн, хийсэн бүхэн чинь яг тэр хэвээрээ эргээд чам дээр тусна. Амьдрал бол бидний хэлсэн, хийсэн зүйлийн цуурай юм. Амьдралыг муу муухайгаас цэвэрлэж, сайн сайхан байлгахыг хүсэж байгаа бол өөрийнхөө сэтгэлийг сайн сайхан байлгаж, муу муухайгаас өөрийгөө цэвэрлэх хэрэгтэй. Бусдыг өрөвч зөөлөн байгаасай гэж хүсэж байгаа бол эхлээд өөрөө өрөвч зөөлөн байх хэрэгтэй. Бусдаар хайрлуулахыг хүсэж байгаа бол өөрөө эхлээд бусдыг хайрлах хэрэгтэй. Амьдрал бол чи юуг өгнө, тэр нь чам дээр эргэж ирдэг жамтай" гэж хэлэв.
READ MORE - Цуурай

Wednesday, May 5, 2010

Танд үйлчилж байгаа хүмүүсийг үргэлж санаж бай!

Нэлээд хэдэн жилийн өмнө нэг зүсэм бялуу задгай 30 мөнгөөр зарагдаж байх үед 10 настай бяцхан охин амттай зүйл худалдаж авахаар кафед оржээ. Зөөгч бүсгүй гүйж ирэн юу захиалахыг нь асуужээ. 
-Шоколадтай бялуу ямар үнэтэй вэ?
-50 мөнгө.
Охин халааснаасаа задгай мөнгөнүүдээ гарган тоолж байснаа
-Тэгвэл мөхөөлдөс ямар үнэтэй вэ гэж асуухад зөөгч бүсгүй бага зэрэг тэвчээр алдан
-35 мөнгө гэж хэлээд охиныг шавдуулахын тулд ийш тийш харан, яарч байгаагаа илэрхийлэв. Учир нь тэнд олон хүн үйлчлүүлж байсан учраас зөөгч бяцхан охинд ийнхүү бага зэрэг ундууцжээ. Тэрээр энэ охинд цагаа зарцуулах сонирхолгүй байв. Бяцхан охин
-Эгч ээ, тэгвэл би нэг мөхөөлдөс авъя гэлээ.
Зөөгч бүсгүй бяцхан охины мөхөөлдсийг авчирж өгөөд нөгөө ширээн дээр очиж захиалга авч эхлэв. Бяцхан охин мөхөөлдсөө идэж дуусаад мөнгөө кассанд өгөв. Зөөгч бүсгүй ширээг нь цэвэрлэхээр очоод нүд нь нулимсаар дүүрч, дуугарч ч чадахгүй хэсэг зогсчээ. Учир нь бяцхан охин мөхөөлдөс идсэн аяганыхаа хажууд 15 мөнгө орхиод гарсан байжээ. Бяцхан охины мөнгө шоколадтай бялуу авч хүрэлцэхээр байсан ч үйлчлэгч бүсгүйд цайны мөнгө өгөхийн тулд 35 мөнгөний мөхөөлдөс авч идсэн байжээ.
READ MORE - Танд үйлчилж байгаа хүмүүсийг үргэлж санаж бай!

Tuesday, May 4, 2010

Зовлонгийн мод

Хуучин эдлэн газрынхаа байрыг сэргээн засварлахын тулд хөлсөлсөн барилгачин маань ажлынхаа эхний өдрийг их л хэцүүхэн өнгөрөөв. Машиных нь дугуй хагарч, ажлаасаа нэг цаг хоцроод зогссонгүй цахилгаан хөрөө нь эвдрээд харин одоо болохоор хуучин жижиг ачааны машин нь ажиллахаа болиод хэрэглээнээс бүр гарав. Орой түүнийг гэрт нь хүргэж өгөхөөр явахад хажууд минь яг л чулуу шиг хөшчихсөн сууж байлаа. Гэрийнх нь гадаа ирэхэд намайг гэрийнхэнтэйгээ танилцахыг хүсээд гэртээ урив. Гэртээ орохоосоо өмнө урд нь байсан нэг жижиг модны хажууд хэсэг зогсоод хоёр гараа мөчирнийх нь үзүүрт хүргэв.
Гэрийнх нь хаалга онгойход нөгөө эр гараа модноос аваад гэртээ орлоо. Хөрсжиж борлосон царайд нь инээмсэглэл тодрон хоёр бяцхан үрээ аваад эхнэрээ үнсэв. Гэрийнхэнтэй нь танилцсаны дараа намайг гаргаж өгөв. Нөгөө модны хажуугаар өнгөрөхдөө би түүнээс гэртээ орохын өмнө тэр модонд яагаад хүрснийг нь их л сонирхон асуулаа. Тэгэхэд тэрээр:

"Энэ бол миний асуудлын мод. Заримдаа надаас хамаараагүй төвөг их гардаг юм. Харин тэр үед энэ бүхэн эхнэр хүүхдүүдэд минь нөлөөлөх ёсгүй гэж би боддог юм. Тийм болохоор орой болгон энэ модонд түүнийгээ үлдээдэг юм. Тэгээд өглөө гарахдаа модноос асуудлаа авдаг. Харин хамгийн инээдтэй нь юу гэж санана? Маргааш өглөө асуудлаа авахаар ирэхэд асуудал маань тийм ч том биш гэдгийг хардаг юм" гэжээ.
READ MORE - Зовлонгийн мод